由深水埗一間Hostel－－Wontonmeen籌備緊嘅飄流閱讀車，日前離奇失蹤。本來事主希望藉住呢個計劃分享書籍、聯繫社區，點知閱讀車未投入使用就已經「疑似」畀人偷咗。

透過網民嘅線索，事主終於喺一個天橋底露宿者嘅「屋企」，搵返呢個消失的飄流閱讀車。原來，一班露宿街友只係想用呢一個有鎖嘅櫃，去貯存比較貴重嘅物品。事主知道咗之後唔單止冇嬲豬，仲好細心咁問佢哋：「如果你哋有需要，不如幫你哋造一台啦！」

事主更加喺Facebook解釋：「飄書活動幫到或服務到嘅人，可能只係小眾，但如果每個人都肯去幫助一小眾的話，1就可以變成2，甚至變成3、4、5。」

「大件事總會有大嘅慈善機構去幫手，我哋做小眾嘅，咁咪去幫自己有能力幫助嘅小眾囉！」

呢個故事令毛毛明白，如果大家連自己嘅一小步都唔行，就唔會知道自己嘅力量有幾強大。

PS：如果各位想捐書，可以去到呢到Wontonmeen！每本書都有價值，每本書都唔應該喺垃圾桶。

(資料及原圖來源：Wontonmeen/Facebook)