唔知大家仲記唔記得之前講過「世界上最悲傷嘅北極熊」比薩呢？（回帶：【廣州地獄海洋館 】可能係世界上最陰公嘅北極熊）

真係隔住個mon都完全feel到佢幾想逃離呢個地獄。大佬呀話晒佢都係一隻北極熊嚟吖，畀返少少尊嚴佢得唔得？居住環境又差，活動空間又細，想迫死人咩！聽講困住佢嗰個廣州正仆佳廣場，最近仲話要擴建?呀！

你唔好聽到擴建兩個字就以為啲動物嘅活動面積多咗呀！其實係呢個pk廣場打算開多個萌寵動物樂園，入面會有大熊貓、白老虎、袋鼠等等20幾種，總數8千幾隻嘅動物，之但係個動物園面積只得5000幾平方米！計返一隻動物大概會有幾平方毫米嘅活動空間，真係皇恩浩蕩呀喂！

好彩嘅係，聽講英國有個野生公園嘅負責人員已經聯絡咗呢個傻的嗎廣場，話想收養北極熊比薩，畀返啲好日子佢過呀！雖然話救得一隻得一隻，之但係毛毛一諗起嚟緊又有更加多嘅動物受害，個心就好唔舒服喇……人已經要住劏房㗎啦，仲要迫到啲小動物都要住埋一份，呢個到底係咩世界……

圖片來源、資料來源：微眾網