幸福嘅日子過得耐咗，就自然會覺得身邊所有嘢都係理所當然：以為另一半接你收工係應份嘅，以為成班朋友約出嚟慶祝生日係傳統，以為長輩喺屋企睇住亞視等你放學放工返去都係必然嘅…… 

台灣呢個網民都一樣，以為公公會日日等佢返屋企，點知有一日公公突然離開咗佢，又因為某啲原因扔晒公公啲相，佢當時真係好慌長，好擔心自己對公公嘅印象會愈嚟愈模糊，甚至有一日會忘記咗公公嘅樣，所以就試下好似外國網友咁，用Google Map碰下運氣喇。

呢個時候，Google大神真係有求必應，畀佢搵到公公生前喺屋企附近散步嘅身影呀。喺掛住公公嘅時候可以見到佢，相信呢個網民一定好感動喇。

唔講都唔知，原來Google Map係有得揀睇返邊一日嘅街景㗎，如果想睇下搵唔搵到親人生前嘅影像，就方便好多喇。

唔少網民分享自己搵到親人生前影像嘅cap圖，話好掛住佢哋。

而家好多人都成日掛住玩電話，同屋企人坐埋一齊飲茶傾唔夠幾句又各自上網，科技可以拉離人與人之間嘅距離，估唔到同時又可以令人用意想不到嘅方式保存同過咗身嘅親人嘅珍貴回憶。成日都話「珍惜眼前人」，而唔係「mon前人」，唔好等你重視嘅人唔喺眼前先嚟後悔呀。

封面圖片、資料來源連結：dcard

延伸閱讀：【係洋蔥呀】用用下Google Map見到愛貓生前身影