唉，毛毛真係老喇，收工已經攰到隻狗咁，朋友打嚟話即興食宵夜都冇力去，諗返起以前讀U嗰陣，晚晚出去食糖水都不知幾精神！話時話，聽講台灣嘅大學冇香港咁free，學生宿舍係有宵禁時間嘅，即係過咗夜晚某個鐘數就唔畀出去，所以係冇出去唱通宵K、食宵夜呢支歌仔唱㗎。

但古乳有暈「深夜總是餓」，突然間口痕想食嘢點算好呢？呢幾個住女生宿舍嘅女同學就諗到一條絕世好橋，就係用電線吊個外賣上嚟喇！

用三條延長線加兩個拖板，就成功神不知鬼不覺咁避過宿管嘅目光，拎到個外賣喇！

其實最抵讚係個外賣哥哥呀！用電線都綁到咁實，真係好pro呀，唔知佢係咪一早已經慣咗咁樣幫班學生哥瞞天過海㗎呢？

有師兄就提提佢哋，用電線始終都比較危險，下次都係用繩啦。

雖然冇得一齊出去食宵夜好似冇咁盡興，不過大家夾手夾腳做無聊事又係幾青春嘅。唉點解以前毛毛樓上冇同學咁樣吊外賣㗎，等毛毛可以伸隻手出嚟幫手食啲，等佢哋冇咁肥吖嘛。

封面圖片、資料來源連結：dcard