所謂「MK」，可以係人流聚集之地旺角嘅英文縮寫，亦可以係一種本地流行文化。所謂「MK仔」、「MK女」，身上都會散發住一種特定嘅氣質，佢哋可能染金毛、剪飛輪海頭、留齊陰，可能少不更事，可能係其他人眼中嘅叛逆青年，而肯定嘅係，經常喺旺角出沒！但時移世易，MK文代發源地旺角亦開始發生轉變，開咗唔少文青小店，其實去旺角唔一定就等於MK仔女嘅，今日就等毛毛帶大家深入唐樓，入樓上舖做個文青啦。

 

We sell beautiful things.

一入到呢間舖頭，第一個感覺就係「簡約」。簡單嘅裝修，白色嘅牆已經令人心情好放鬆，店員又唔會跟實你同你「介紹返」，可以慢慢咁睇有咩beautiful things賣。

舖頭入面仲有部街機畀人免費玩㗎！

小店最入面仲有一個氣味圖書館，用玻璃樽保存唔同香水氣味，除咗常見嘅花香之外，連書紙、生日蛋糕、酒味，甚至比較抽象嘅眼淚、大自然、煩惱氣味都有。

店舖網頁：Storerooms   

 

皮革是一種生活態度

喺熱鬧多人、間間舖都鬥大聲播歌嘅旺中對面，有一間可以畀你舒舒服服做手作嘅皮革工作室。

唔好以為皮革好難整呀，導師會一個一個step咁教你慢慢整，有唔少初學者都鍾意整鎖匙圈㗎，再有心機啲就可以整銀包之類。

講起皮革，多數都淨係會諗到銀包手袋之類型格啲嘅items，但呢度就有皮革玫瑰花賣，放喺玻璃樽入面，想保存幾耐都得啦！估唔到皮革都可以做到咁浪漫溫柔嘅感覺啵！

店舖網頁：Pure & True高級皮具專門店 

 

手作愛好者天堂

好多文青都唔鍾意盲目消費，比較享受自己慢慢D.I.Y.嘅過程，上嚟呢間手作愛好者天堂就啱晒喇。呢度有齊唔同類型手作品嘅材料，好似布藝、橡皮、滴膠咁。

而家好流行滴膠手錶，如果肯花心思同時間，試下自己整都唔錯啵？

毛毛個卡片套係自己整㗎，靚唔靚先？塊喱士就係以前喺呢度買㗎喇。

除咗賣材料，呢度仲會不定期舉辦手作班，因為店主相信材料就好似種籽咁，只要配合創意，就可以栽種出獨一無二嘅手作製品。

店舖網頁：ZAKKA FARM   

 

每件衣物也獨一無二

做文青，梗係要內外兼備啦，想一睇就知你係文青，就要執返個文青look喇！呢間小店嘅靚衫依顏色掛好，最啱大家憑感覺揀衫。恤衫、長裙、連身裙，全部都係文青必備呀！

咁多靚衫，原來唔係亂咁嚟㗎，除咗店主自家設計嘅款式，仲有vintage古著，同埋韓國簡約style嘅時裝。

呢個小角落佈置得咁清新，原來係試身室嚟！嘩女仔試衫已經夠耐㗎啦，仲要整到咁靚，店主驚唔驚客人唔捨得出返嚟呀？

店舖網頁：十一妞更衣室

 

復古與新潮兼備

以前細個覺得身上有紋身嘅公仔佬實係唔簡單，仲分分鐘大有來頭，但時代唔同喇，紋身唔再只係江湖人士嘅標記，而係一種藝術。

呢間紋身店嘅裝修復古，擺滿七彩顏色嘅怪獸公仔，等紋身嘅時候欣賞下個環境，應該會冇咁緊張（好似係）。

毛毛最鐘意就係呢個寫住「亂拋垃圾 下流賤格」嘅膠牌喇，店主仲印做貼紙仔，客人可以拎返屋企留念㗎～

裝修就咁復古呀，但呢度唔係紋左青龍右白虎咁老套，而係潮流興嘅彩色款㗎～

店舖網頁：美富紋身 MOFO Tattoo 

 

醫肚＋尋寶＝懷舊Cafe

文青都係人，文青都會肚餓，文青都要醫肚㗎！喺紋身店同一棟唐樓，就有兩間唔同style嘅Cafe喇。一入到呢間Cafe，暗黃色嘅燈光已經令人好relax，啱晒同朋友坐喺梳化慢慢傾偈。Cafe入面每張枱嘅款式都唔同，加埋懷舊嘅擺設，就嚟影到毛毛相機冇電喇！

店主知毛毛口乾，仲特登整咗杯Strawberry Mocca畀毛毛飲，係愛呀……真係甜到連平時唔飲咖啡嘅毛毛都覺得好好味呀！

除咗嚟醫肚，鍾意古董嘅朋友仲可以嚟尋寶㗎，呢個角度有大量估佢唔到嘅懷舊雜貨，好似牛龜電視、行李箱、相機咁。

店舖網頁：老二公社  

 

和小貓一起享受天然光線

呢間Cafe嘅裝修就以清新為主，用大玻璃採集天然光線，你可以悠悠閒閒咁坐喺窗邊望返落去人來人往嘅旺角，再飲啖花茶，享受鬧市中難得嘅閒逸。

櫻花水信玄餅同豆腐芝士蛋糕，唔止影相靚，食落仲好好味！

店內嘅主子周不時會行嚟行去巡視業務，有冇機會畀主子寵幸就睇你運氣喇。

店舖網頁：小房子