噚日，係一個普通嘅星期日，但亦都係「還路於民」嘅大日子。

健康空氣行動、「行德」、拓展公共空間、非常香港，連同400幾位市民合辦「非常（）德」，將德輔道中（文華里至摩利臣街）變成200米臨時行人專區，目的係希望大家可以重視既定嘅城市界限，原來馬路唔只止係行車咁簡單，仲可以有好多社會用途！

200米話長唔長，保特用19秒19就跑完，但呢個「非常（）德」200米臨時行人專區，總共有47個參加單位，有成13個唔同嘅主題活動，毛毛比平日用更多時間去細心欣賞，發現行開嘅馬路比起平時嘅形態更美。

從上環地鐵站一出，就聽到busking嘅音樂，鋪咗草皮嘅德輔道中依舊咁多人同擠逼，但成件事竟然好異國風情。

由「執嘢」主辦，提供一個免費換物嘅平台，令所有「食之無味、棄之可惜」嘅寶物可以搵到屬於佢嘅主人。

「其實我喺第一次參加，之前見到『執嘢』召募檔主，咪搵埋幾個朋友一齊將唔要嘅嘢拎出嚟囉，有人肯要好開心㗎！阿叔！呢本書好嘢嚟㗎！」－ 地攤檔主Karen

見到阿叔由半信半疑，到好似「執到寶」咁拎住本書走，再同Karen揮手，原來人同人之間嘅交易，唔係下下都要用金錢去衡量。

草地上有一個個流動嘅教科室，提供免費工作坊，畀好多大人細路可以喺戶外嘅環境上一課，學下有關香港非物質文化遺產知識，就好似傳統花牌、花鈕同客家話，目的係提高大家對傳統工藝或環保嘅關注。

好學嘅毛毛梗係唔執輸啦，但喺中午時候，工作坊嘅名額差唔多都已爆滿，毛毛唯有含淚睇住大家玩啦！

「我哋呢度係教小朋友用廢紙摺唔同嘅動物，希望大家可以重用廢紙，唔好直接扔咗咁嘥。」－義工Amy

除咗摺紙之外，仲有好多唔同嘅遊戲，就好似呢個毛毛細個成日玩嘅電擊棒，等大家可以玩住去關心個地球。

報紙的確係兒時恩物，冇玩具玩咪用報紙搓成個波，再唔係就摺紙飛機鬥遠。

今次各位小朋友可以成為一個真真正正嘅街童，就地取材，玩乜都得，鍾意踢紙球又得，玩保齡球又得，可以享受一下喺街上玩嘅自在，順便識返幾個FD子，快樂就係咁簡單。

平時放假，一係約朋友行街食飯，一係毒留家中，今日大家可以嚟個大解放，一齊出街hea！

聽住街上人來人往嘅嘈雜聲，間唔中嘅電車叮叮聲，坐喺到竟然意外地舒服。喺短短嘅幾十米空間中，有情侶依偎談心，有成班朋友圍圈野餐，有人靜靜哋睇書，毛毛有一刻以為自己喺外國?！

「非常（）德」雖然只歷時6個鐘，但其實係主辦團體多年嚟努力嘅成果。而且，喺炎熱嘅九月，有好多工作人員都幫手維持交通秩序，亦有其他人掛住牌，做大家嘅回收桶，目的都係想大家可以樂在其中嘅同時，唔影響到其他人。

「行德」表示希望未來可以定期舉辦類似活動，到有一日，德輔道中可以永久成為行人及電車專區。

講起人多車多，好多人都會話「香港係咁㗎啦！」，但經過今日，原來香港可以唔係咁㗎喎，一個人車共融嘅社區可以就係咁樣樣~