打工仔嚟講，有兩種，有一種人寧願放棄個早餐，空住個肚返工，都要爭取瞓多一秒得一秒，有一種人就鍾意慢慢食個靚早餐，享受下個good morning先斯斯然返工嘅。

不過每朝早都用早餐整個火柴人小劇場嚟玩，就真係第一次見喇！呢個網民日日都用佢條腸仔同個包砌做唔同火柴人，好似唔驚玩到遲到咁啵。

呢個腸仔人完美表達打工仔喺星期一朝早扭嚟扭去唔願起身嘅無奈心情…… 

星期二三……都一樣做到好似隻狗咁攰…… 

星期四，約女朋友開心下先嘻嘻。講下咋，作為一隻單身狗…… 收工除咗放狗，仲有咩好做呀…… 

Yeah終於星期五喇！返屋企沖返個熱水涼就最舒服，仲梳乎過梳乎蛋呀～

星期六就梗係要去happy hour跳下舞！你有冇聽過Saturday Night Fever呀？

腸仔人！發生咩事呀！唔好死呀！明明今日係星期日，應該應該好開心先喺㗎？！有知情人士就透露，親耳聽到腸仔人臨死之前用盡最後一口氣吐出一句說話：聽，日，星，期，一…… 之後就吐血爆頭身亡喇…… 唉，其實毛毛每晚諗起第二日要返工都會好似佢咁囉。

封面圖片、資料來源連結：爆廢公社