呢排Pokemon Go咁hit，去到邊都見到比卡超身影呀，不過比卡超咁打耳，毛毛由細細個開始已經係佢fan屎啦，每次見到佢黃黚黚嘅身體同紅卜卜嘅面珠，就自自然然好想咬佢一啖……因為佢真係好似蛋包飯加茄汁呀～

之前日本個好卡哇依嘅大胃王木下佑香拍咗條片教大家整比卡超蛋包飯，只要用保鮮紙包實啲飯固定造形，再鋪雞蛋喺面，加少少紫菜就完成，唔止簡單易整，仲好可愛呀！

台灣有網民睇到呢個教學之後，就試下自己整一次喇。不過，唔知點解隻比卡超個樣有少少fail啫，唔知係佢個精靈球入面都有土地問題，定係畀一拳超人打中咗呢…… 

有另一位網民都有些牙自己整嘅比卡超蛋包飯製成品呀，雖然就唔係好似樣，不過笑咪咪咁又幾得意啵。

世上每碟蛋包飯都逃唔過畀人食落肚嘅命連，比卡超都終有同我哋講byebye嘅一日，睇到呢度毛毛真係唔忍心再睇落去喇…… 真係估唔到比卡超係畀人煮做蛋包飯死，而唔係同火箭兵團戰鬥而死㗎！

封面圖片、資料來源連結：木下ゆうか Yuka Kinoshita／YouTube、Irenelala／PTT、dcard