明明都就嚟十月啦，真係唔明點解可以仲係咁熱㗎？更加唔明嘅係，點解仲有咁多女學生著住件冷衫通街走？唔通後生真係勇者無懼？有人話女學生著冷衫係為咗潮啲，都有人話係因為件校服太透，所以想遮一遮，冇咁尷尬。

夏季校服太薄太透，好容易透咗內衣顏色出嚟，所以唔少學校不明文規定女同學要著白色胸圍同打底嘅，即係就算校規唔寫，老師都會另外同女同學講㗎。最近就有自稱係庇理羅士女子中學學生嘅網民喺網上話，學校喺早會之後無啦啦要檢查同學嘅bra帶顏色，仲要「一係攞條bra帶出嚟睇，一係除衫」！唔係啩，會唔會第日要check埋底底咩色㗎？

之後都有同學開post補充，話唔係除晒所有衫，而係除冷衫，不過都一樣要摷條bra帶出嚟畀老師檢查，覺得好離譜，侵犯同學私隱。毛毛就覺得，平時同學都會著校服㗎啦，隔住校服就咁望落去冇透色咪ok囉，要露bra帶檢查，相信會令同學們好難受。

全白色校服嘅學校要同學著淺色內衣都理解到呀，不過毛毛上網搵到呢間女校套校服係咁樣樣，一件白恤衫加青BB背心裙，會透bra帶嘅膊頭位一啲都唔透㗎啵，到底點解仲要檢查bra帶咩色呢？

封面圖片、資料來源連結： 名校 Secrets