「褪色日記」
機緣巧合下，天茵接觸到印度彩繪(Henna)。
「我將每日嘅負面感受寫喺自己身體上，兩星期之後，個Henna就會完全褪色，就好似帶走我所有唔好嘅想法。」
未做全職Henna畫家之前，天茵曾經諗過打份普通工就算，甚至試過派傳單過日子。
有一日佢派完傳單之後，返屋企瞓教，點知一醒瞓照鏡見到自己個樣又殘、妝又花晒，心諗：「自己22歲明明可以做好多嘢，點解會過得咁潦倒⋯⋯」
一直都鍾意用皮膚做畫布，用最直接嘅方法表達自己，可能係呢樣特殊喜好，令天茵同Henna一拍即合。
2014年6月開始到而家，天茵由擺街檔到手作市集，踏上全職手作人嘅旅途。
不過，Henna對天茵嚟講，並唔係一技之長咁簡單，佢係一個「褪色日記」，令佢正視情緒問題。
「好似有個盒困住我，感覺個腦都被逼得好緊好緊。」
由細到大都自覺有情緒困擾，天茵形容自己細個係一個「驚青」嘅小朋友，好怕其他人嘅目光。
中四嗰陣，天茵開始服用不知明嘅減肥藥，可能受副作用影響，開始出現幻覺、幻聽。
「我試過以為好朋友喺背後講我壞話，之後就衝過去鬧佢，但見到佢一面擔心同愕然，我先知原來一切都係假。一時接受唔到，我喺位到拎起把?刀自殘。」
最嚴重嘅時候，天茵每晚失眠，成張床都擺滿白紙同原子筆，晚晚聽住收音機亂寫、亂畫，抒發自己。
直到爆發嘅一刻，天茵先注意到自身情緒困擾嘅嚴重性。
由廢青到沸青
追求夢想成功，對好多人嚟講的確遙不可及。
「我唔會覺得自己叻，反而係我唔夠其他人士叻，冇嘢可以輸，所以試嘅『機會成本』低。」
自我反省過後，天茵決定唔可以再廢落去，決定擺街檔。用一個星期準備橫額、一百多張圖板，夜晚喺蘭桂坊擺檔幫人畫Henna，勉強維持自己嘅生活。
「當一個人去到谷底就會振作。」
2014年嘅雨傘革命亦都係其中一個誘因，將天茵嘅動力推到最大。
佔領期間，天茵喺金鐘免費幫佔領人士畫henna，由「勿忘初衷」寫到「D L L M」。對於老一輩嘅唔理解同漠視，天茵決心要做一個青而不廢嘅人，令自己嘅聲音得到重視。
「之後我就開始搵唔同嘅市集，甚至不恥下問其他人點樣擺檔，就係咁就喺『手作市集』碌咗差唔多兩年。」
直到而家，天茵已經喺尖沙咀開咗間studio，麻雀雖小但五臟俱全，喺一個小小嘅空間做喜愛嘅事，為自己而奮鬥。
I know that feel, bro
「我希望其他人聽到『天茵』呢個名，會好似聽到朋友嘅故事咁。」
兩年幾嚟，天茵除咗儲咗班熟客，其實都儲咗好多朋友。
難得一見嘅坦誠，天茵好容易可以同客人溝通，感染佢哋重新面對自己。喺畫Henna期間，人與人之間嘅距離拉近咗，令客人安心一訴好多埋藏於心底、連身邊人都未必知嘅秘密。
「我只係想畀一種『I know that feel, bro』大家，同埋畀到佢哋尋求嘅支持。」
不斷強調自己唔叻嘅天茵，為咗真正幫到客人、朋友，而家進修緊有關課程，希望可以深入了解人與人之關嘅關係，提供確切嘅方向畀大家。
用自己個名做店名好大賭注，稍微做得唔好，分分鐘身敗名裂，但天茵話「我冇諗咁多喎！」，因為Henna並唔只係生意，而係佢嘅生命。
「Henna已經係身體嘅一部分，我好鍾意而家嘅自己。」
「我以前覺得要做一棵大樹先幫到人，但而家發覺，其實我可以揀做一棵西蘭花，好好保護下面嘅螞蟻。」
地址：九龍尖沙咀漆咸道南61-65號首都廣場163室
===============================
毛記專題，不定期上市。
求其交貨，純粹扮工蛇王，唔使期待。
#100毛 #毛記電視
