最近行出街，10個妹豬有9個半都戴住條黑色繩喺頸上面，有人話似狗帶，但毛毛就覺得有種說不出嘅味道喇！原來呢款黑色繩叫做Choker，簡單得嚟又易襯，氣質／型女／性感／成熟都look都襯得掂，復古得嚟又新潮，唔怪得咁多妹豬鍾意啦！

由一代美人瑪麗連夢露，到《Pulp Fiction》女主角，到而家至hit嘅韓星好似IU同孔孝真咁，都係Choker嘅fan屎，今季你又點可以冇返條Choker傍下身呀？今次就同大家講下點樣D.I.Y. Choker啦～

要做一個型女，首先你要有……粗幼唔同嘅皮繩、繩夾2個、圈圈2個、龍蝦鉗1個、銀鍊。粗嗰條皮繩係最貼住條頸嘅，長度啱啱好可以圍住條頸一個圈就ok，大約係33cm，幼皮繩就可以加返3cm，留意粗皮繩同繩夾闊度要買返一樣呀，毛毛買嘅係5mm。另外當然仲要準備一款你鍾意嘅吊墜或者珠仔啦！

首先將兩條皮繩其中一頭疊埋，用繩夾夾實。（毛毛知個鉗係大咗啲，唔好意思囉……）

跟住就將吊墜穿落幼皮繩，再將兩條皮繩另一頭都用繩夾夾實。

一邊就扣上圈圈同龍蝦鉗，另一邊就扣上圈圈同大約3－5cm嘅銀鍊，方便調校條Choker嘅鬆緊。

完！成！係咪好簡單呢，其實買齊材料，只要10分鐘就整好一條屬於你嘅Choker㗎喇，快快手整多條畀好姊妹一齊戴都仲得呀！可能你心諗淘佬都只係幾蚊條，使乜自己整咁煩，不過你戴Choker都係想型啫，話畀人知係自己整，咁咪型上加型囉！

延伸閱讀：【其實唔難】食剩個月餅盒不如整做首飾盒啦！