毛毛不嬲都好卑微，又冇錢又冇囡，不過係咪就唔可以對人生有少少希望先？少少啫，唔過份呀，可？一齊FF下啦！

【齊齊整整食飯】

出到嚟做嘢，屋企人嘅返工放工時間都唔一樣（毛毛仲要冇收工時間?），大家要喺屋企見到一面都好似溝囡咁，要講緣份㗎！

一家人齊齊整整，坐低食飯嘅或然率直頭係sin 180°呀。

即係點？即係零呀！

毛毛只係想大家平日可以坐滿張飯檯啫，點解好似咁難咁嘅。

【公司喺屋企樓下】

讀書嗰陣，就算要跨區返學，大部分人都係半個鐘車程就到。有啲同學，直頭住喺學校附近?呀，佢哋連 I go to school by bus都無資格講㗎！

出到嚟做嘢先驚覺，公司同屋企嘅距離咁L遙遠。由荃灣入柴灣，由屯門過香港仔，每一段路程，都好似係彌補緊毛毛冇錢搭飛機去旅行嘅慘況。

毛毛唔敢奢求公司喺屋企樓下，毛毛只係唔想轉咁多程車咋⋯⋯

唉，X，又塞車⋯腦細！「back after lunch」呀！！！

【秋季有薪旅行】

秋風起，小朋友最歡喜，因為又到咗學校旅行嘅大日子喇～除咗可以帶唔同零食去野餐，仲可以拖實女同學隻手仔一齊行，hehe。

旅行地點唔重要。彭福公園，甚至香港動植物公園，都已經滿足到小學雞們離開課室嘅慾望。

長大後嘅毛毛都有一個小小嘅願望：「腦細一年畀一日假去旅行，唔過份呀⋯⋯」