毛毛細細個睇戲已經深知主角唔會死呢個黃金定律，但大個咗發現世事冇絕對嘅，主角都唔係萬能嘅。相反有啲配角可能你唔察覺佢嘅存在，但佢嘅生命力異常地頑強，甚至到結局個一刻都仲喺度！

古惑仔 － 包皮

古惑仔呢套戲可以話係香港電影中嘅經典，當中嘅江湖情仇令好多角色被砍死，但當中有一人，竟然可以喺咁多集都屹立不倒 ，佢就係包皮喇！就算蕉皮同巢皮死咗，又唔好打、又懦弱怕事嘅包皮喺最尾一集《勝者為王》都仲可以同浩南哥、山雞佢哋排排企添！

大家對於包皮之死都激烈討論，原來係漫畫版呢，包皮喺拉斯維加斯追數時畀人砍死嘅（好似係），但電影版就冇交代到咁遠，所以喺毛毛心中，包皮永遠都係不死之身！

海賊王 － 巴基

有睇海賊王嘅人一定知巴基！巴基嘅身體可以四分五裂咁各處攻擊，但問題就係巴基每次使出呢個絕技，雙腳都唔可以離地，所以識飛又點吖，咪又要飛返嚟！毛毛仲記得有一次路飛扔咗巴基其中一部分上天，巴基好耐先搵返...

雖然巴基睇落好似冇乜料到，但佢假假地都經歷唔同嘅大戰，又同高手交戰過，到而家都仲完好無缺。有時「死好命」都係優點嚟嘅～

不過有網民話巴基其實係隱藏嘅高手，甚至吹到有一日，只有佢先可以同路飛挑機爭海賊王嘅寶座！
 

屍殺列車 － 金代理

出場唔夠一分鐘嘅金代理，戲份只有一開頭，畀身為上司嘅男主角＿完就完事。男主角喺列車上同喪屍搏殺緊嘅時候，喺首爾嘅金代理究竟點解可以有機會打電話畀男主角呢？佢係點樣可以喺淪陷嘅首爾到生存，同時又發現到咁多嘢？

一切都係一個迷，甚至有人話金代理係幕後嘅big boss添！

網民推斷金代理打完電話都因為內疚自殺，所以都係一個已死嘅角色，不過電影就冇交待喇！

睇完三個案例，毛毛明白做人最緊要都係低調，唔搶風頭做主角咪可以長命啲囉！