兒時嘅快樂可以好低成本，但係絕對唔低質！

毛毛自細就表演慾強，鍾意演出各種唔同嘅角色，喺屋企隨手嗱起一樣嘢，都可以當做道具，扮鬼扮馬，為屋企人同自己帶嚟唔少歡樂。

1. 超人

低成本嘅cosplay戲服來源有好多，第一種，亦係最好用嘅一種，一定係大毛巾。

一條大毛巾，搵衫夾夾喺頸後面，再著埋媽咪條紅色大底底喺條褲出面，就可以變成超人喇，就係咁簡單！

不過最好就叫阿哥家姐細佬妹睇水，如果唔係畀老母知道你玩佢條底底⋯⋯嚟嚟嚟，今晚加餸，藤條炆豬肉！

2. 香港小姐

毛巾嘅用途，又點止一個呀。人嚟music～「Da de da, da de da, da de do, dada dada do」

「披住呢條毛巾，攞住馬桶刷，我覺得我好有使命感。喺嚟緊呢一年，我一定會盡我責任，成為一位好港姐。」

咦，點解個馬桶刷好似有陣味咁嘅⋯⋯

3. 印度人

沖涼前除衫嗰陣，將件Tee反轉笠住個頭，再喺頭後面打返個結，一個富有中東風嘅印度人裝扮就完成喇。

笠住咗個頭，實會神不自禁咁左右搖頭，有時仲會連語氣都變埋。

4. 龍珠

沖涼嘅時候，毛毛都會把握機會，努力創造cosplay生涯嘅代表作！洗濕晒個頭之後，唉唔L驚，馬上捽返少少立痴痴嘅⋯嘅洗頭水。

啊！！！哈咩～～哈咩～～～哈！！！！！！！！！再射少少⋯⋯水出嚟，「我就係悟空！」不過記住，千祈唔好叫得咁大聲，如果唔係⋯⋯

「衰仔，你又喺廁所搞乜呀，快快脆沖完呀，嘥鬼哂啲水！」

毛毛的溫馨提示：

玩任何cosplay之前，請先確保自身安全－－「遠離老母，cos得更好」。