看更叔叔睇落好hea，但其實佢哋都有一顆寂寞嘅心。

黃伯，62歲。作為一個夜班看更，返工嗰陣仔女未放工；收工嗰陣，仔女又返咗工。

大半世都係做印刷，黃伯兩年前退休就改行做保安，同好多退休人士一樣，覺得留喺屋企好悶，咪諗住考返個牌做看更，打發下時間囉。

夜班看更工作流程

「我哋睇落可能好得閒，但唔代表做嘢唔認真。」

黃伯唔否認自己會hea，但係佢堅持：應hea時hea，做嘢就唔好揸流攤。呢一點，應該大家都一樣。

夜班看更一更，係有十二個鐘。平時都係見佢哋睇電話同瞓覺，究竟有咩做呢？

「都有好多嘢做㗎！住客出出入入，見到呀婆、小朋友同埋傷殘人士，都會幫一幫佢哋開門。」

「而且仲要巡樓、檢查有冇異味、住客有冇鎖好門、有冇奇怪人...仲有呀，我哋要處理好多投訴。」

「你知唔知夏天一到，有幾多人投訴樓上冷氣滴水？」

每晚黃伯都要由23樓行到地下。

「我哋睇落可能好得閒，但唔代表做嘢唔認真。有時夜媽媽見到有生面口嘅人，就算佢哋唔想，我都會叫佢哋登記，再喺閉路電視?住佢有冇去錯第二度。所以呢，我哋要一眼關七，除咗要認清咁多位住客，對陌生人仲要有少少警覺性。」

不過，去到深夜，想搵啲嘢做下都冇。

當人人返晒屋企瞓覺，管理處就只有夜班看更一人自得其樂，聽下收音機、篤下手機，望住個鐘一秒一秒咁過。

夜班看更入門資格

呢份工，講真都係無咩技能。幾乎人人都做得，不過，唔係個個都捱到。

「夜晚人影都冇隻，真係要捱到悶先做到。」

無錯，天一黑，夜班看更真正嘅技能，就係悶。每日見到家人嘅時間，唔夠一個鐘。

而每一個住客都趕住搭?返屋企，人來人往，但係無人同自己來往。

電子產品，變成最佳拍檔。

其實看更並唔係得新年先咁好口，佢哋一直都係等緊一個機會可以同大家熟絡下。

平時夜闌人靜時，不妨用等?嘅時間，同佢哋吹返幾句水，一齊渡過漫漫長夜！

＃毛記專訪 #夜班看更