耶穌曾經話過：What doesn't kill you makes you stronger，唔明雞腸？即係話無法置你於死地嘅傷痛會令你更加強，就好似每次畀女女拒絕，就會令你更加有決心改變自己去識下一個女女咁…… 原來喺動物嘅世界，一樣都係奉行呢個原則㗎！

日本高知市有間動物園養咗條娃娃魚，3年半之前，園方扔咗10條金魚仔入娃娃魚個水池入面做飼料，點知其中一條金魚仔竟然冇畀娃娃魚食到，匿下匿下，成功生存落嚟呀！

聽講呢條奇跡金魚唔係靠美色收買娃娃魚嘅，亦都唔係靠彩數，而係佢夠醒目，識得睇住娃娃魚眉目眼額，一覺得唔對路就即閃，就係咁樣戰勝本來要成為午餐嘅命運！

每次殺不死你殺不死你也醫好你～金魚仔最強嘅地方就係，佢竟然係靠食娃娃魚嘅脫皮生存落嚟㗎，仲由細細條金魚仔生到有成25cm咁長，成條鯉魚咁款呀！

金魚仔呢個努力生存嘅故事真係好有親切感！好有大道理！好勵志！金魚仔，切記要爭口氣！要爭口氣！你不要死！

封面圖片、資料來源連結：excite.co.jp、高知市みどり課「わんぱーくこうちアニマルランド」