拎家用返屋企畀老竇老母就個個月指定動作啦，但每次見到公公婆婆爺爺嫲嫲想話畀少少錢佢飲茶用，佢哋都實叫你儲起佢，甚至仲以為你未出嚟做嘢，畀返零用錢你轉頭…… 唔好怪老人家長氣冇記性啦，其實佢哋都係錫你啫～

台灣有個乖孫女就話佢嫲嫲又塞錢畀佢喇，仲要一邊塞一邊叫佢收好呢1000蚊（台幣）用嚟食飯，雖然乖孫女已經返緊工，不過廢事激到嫲嫲唔高興，所以就唯有袋住啲零用錢先啦，果然係乖孫女呀下！抵嫲嫲咁錫你！

不過，世事又點會咁美好呀，原來嫲嫲口中嘅1000蚊，其實只係6嚿水……唔通人老精鬼老靈，嫲嫲只係扮闊佬，其實打斧頭？！

乖孫女又點會咁諗佢至錫嘅嫲嫲呀，佢話其實自己睇到嫲嫲偷偷地數銀紙，見到嫲嫲老喇，動作都開始慢喇，可能眼花花睇錯先畀少咗佢。

原來嫲嫲唔係諗住詐詐帝呃個孫女，而係永遠都當佢細路女咁愛錫，就算個孫已經出嚟做嘢喇，都仲會驚佢冇零用錢使。毛毛都諗起有次嫲嫲口噏噏話對唔住其他幾粒孫，錢就得咁多，淨係可以畀最乖嗰個……然後就拎咗個10蚊銀塞落毛毛隻手度…… 咦，點解突然間睇嘢咁朦嘅？唔講住喇，毛毛個鼻畀個洋蔥攻到好酸呀…… 

封面圖片、資料來源連結： dcard