「我唔想要一個空白嘅人生。」

大學畢業、還貸款、做嘢、儲錢、買樓、結婚、生仔⋯係社會既定嘅路線。

但自己嘅路，係唔需要由他人去既定，Nick話畀大家聽，咩叫前路由我創。

因為，佢真係腳踏實地，徒步咁行自己想行嘅路，出發去日本。

「我想做自己鍾意做嘅嘢。」

難，真係好難，但唔踏出第一步，你唔會睇到出路。

「我都係一個普通城市人，好明白戶口要有錢、安定生活好重要。但人生真係冇其他嘢可以做咩？」

今年28歲嘅Nick，20歲喺瑞士完成酒店管理diploma，正式成為社會新鮮人。

喺香港投身酒店行業，一做就做咗五年。

直至25歲，佢決定放棄安穩。

「25歲呢年好特別，如果我可以活到75歲，即係已經過咗1/3人生，但都未做過啲咩壯舉。 我想將咁特別嘅一年留返畀自己。」

由淺入深，台灣單車環島遊係佢踏出嘅第一步。Nick用咗22日，每日踩80至100公里，沿海踩勻成個台灣，最後冇穿冇爛咁完成挑戰。

亦因為呢個旅程，令佢明白原來人嘅潛能真係無限㗎。

「雖然真係覺得好難好攰，但沿路遇到好多唔同嘅人、好靚嘅風景，所有擔憂都會即刻消失。」

下一站－日本​

四國即係邊四國？答案係：德島縣、高知縣、愛媛縣、香川縣。

Nick由香港出發，搭飛機到達日本，再搭巴士到鳴門嘅起點，然後唔靠任何公共交通工具，只靠雙腳去完成佢呢次遍路之旅。

「用雙腳雙雙行唔同嘅風景，會感受到與別不同嘅感覺。」

朝聖者會模仿弘法大師當時嘅衣著（包括白衫、木杖、草帽等）

雖然呢段係有佛教背景嘅朝聖之路，但冇宗教信仰嘅人會視呢個旅程為挑戰同修煉，Nick亦係其中一位。

「我想體驗下佢修煉嘅精神，完成到嘅話會好有成功感，亦會係我人生嘅壯舉。」

但原來現實與那理想總不太同，呢條路並唔係咁簡單㗎。



「第一次覺得有生命危險。」

驚險嘅嘢又點止咁少呢。當Nick去到第11番嘅時候，遇到第一座高山，十幾公里路程，由100米爬升至700米。

太遲出發，令路程非常趕急。
「我當時冇睇清楚地圖，準備唔夠，得返半支水，沿路又冇補給地點，我嗰一刻好驚自己會死。」
粗心大意嘅徒步行者遇上崎嶇嘅山路後，終於都學精咗，前一晚會睇好晒地圖、買齊糧食、早啲起程，誓要推翻「人類總要重複同樣的錯誤」呢個定律。



「我覺得お接待（Osettai）係好奇妙嘅事」

雖然困難重重，但Nick遇到嘅好人好事絕對比困難多。

「Osettai即係你唔可以抗拒嘅好意，我之前從來未試過遇到啲咁嘅事。」

旅程中，會有執紙皮嘅婆婆畀錢佢、遇上颱風大雨時，會有超市主管叔叔畀生果佢，仲邀請佢返屋企，一齊Shabu Shabu再留宿一晚，令七成時間都要野宿嘅Nick，都有機會嘆下世界。
 

「喺香港或者普通觀光旅遊，好難有機會遇到，可能大城市嘅人都比較多憂慮同執著，呢啲都係徒步旅行帶畀我不一樣嘅體驗。」

用咗三個月嘅時間，Nick終於走完四國遍路88座寺院。

「當我行完成個旅程，搭車出返大阪嗰時，真係好想嘔！好想落車行呀哈哈！」

世事就係咁奇妙，可能你覺得自己一生只會平平淡淡咁過，但一個小小嘅旅行，已經可以成為一生中嘅壯舉。

「每一段旅程都好似毒品咁，會令你上癮。」

因為當年嘅一個決定，令Nick搵到最適合佢嘅旅行方式，亦令佢嘅人生唔再只有黑白色。

20歲、30歲、40歲嘅你，有冇曾經覺得自己嘅人生好乏味？萬事起頭難，要踏出第一步的確唔容易，但你唔嘗試跳出呢個框框，又點知自己嘅人生到底可以有幾精彩呢？

「一開頭都覺得冇可能做到，但人係要相信自己。」

#毛記專訪 ＃徒步環日本四國