喺漫長嘅中學生涯中，教唔同科目嘅老師都好似有唔同口頭禪咁，唔知你哋嘅老師有冇講過類似對白呢？

【體育老師】

「手上面係咪揸住咗個波喇？」

自從中學畢業後，都唔知幾耐冇認真咁做運動，都唔知幾耐冇揸過個波喺手。

如果而家見返當年嘅體育老師，毛毛想同老師講：「未呀！二十幾年都未呀！」

【生物科老師】

「請各位同學落嚟拎seed！」

毛毛中學嘅時候，冇啦啦成級嘅人都要種嘢，見人數眾多，老師唯有開中央咪通知大家去實驗室拎種子啦，之後就出事了！

成班同學聽到老師大庭廣眾咁叫我哋拎seed，心諗做得呀蛇果然夠大方，而且喺生物學上，呢個研究都非常正常啫。

當然啦，大家去到實驗室就知一切都係伏。

【家政老師】

「快啲出嚟攞刨！」

上家政堂，學下煮嘢食啫，使唔使玩到咁大？成班同學仔你眼望我眼，心諗老師好地地做咩叫我哋裸跑，唔通返工壓力真係咁大？

老師見我哋成碌木咁，終於忍唔住講多次：「今日學炆薯仔，快啲出嚟攞個薯仔刨呀！」

嚇死人咩，毛毛仲以為今舖實畀人睇蝕晒...

老師嘅金句，又點止咁少吖！如果你個腦仲存在呢啲那些年嘅回憶，留言話畀毛毛知，一齊笑下！

＃毛毛些牙