2016年10月06日 星期四
【媽呀】一時手快用枝筆搲痕 悲劇就發生喇…
世界上最遠嘅距離，唔係兵仔同女神嘅關係，而係你知道隻腳好痕好痕，但你隻手指同粒蚊癩之間，隔住條厚厚嘅褲……
隔住條褲嚟搲痕又真係點出力搲都唔夠爽嘅，呢個時候，不如搵枝筆幫手啦，枝筆夠晒硬，搲落去感覺準好多！台灣有個網民就話佢FD子用咗原子筆嚟搲腳喇，不過一個唔小心，醒唔起枝筆係開咗嘅，搲咗幾多下，咪畫咗幾多下囉…… 照咁睇嚟，佢都真係好痕下啵。
由細到大都聽過好多止痕奇招，好似搽口水呀、用指甲印啲格仔呀咁，仲有一招咪就係用原子筆圍住粒蚊癩畫個圓圈囉！喂呀人哋係畫圈，唔係9畫喎，咁樣止唔止到痕㗎？
其實個大頭蝦FD子是咪諗住學日本個捉蚊神之手咁，用原子筆當係捕蚊器呀？不過人哋係將隻蚊收入筆頭，唔係用筆頭嚟亂搲啵……
封面圖片、資料來源連結：yingyingchou ／PTT
