講起夏天，大家都會諗起大海，淡藍嘅顏色、輕輕吹嘅海風、鹹鹹地嘅氣味……雖然盛夏已經同我哋沙唷啦啦，不過趁秋天涼涼地，去戶外玩都唔會一身臭汗，咪仲舒服？今個weekend，不如就去香港後花園－西貢，悠悠閒閒咁hea一日啦。

第一站－食街醫肚

山長水遠入到嚟，梗係要醫肚先啦。西貢除咗海鮮出名，泰國菜都一樣咁出色。食街（福民路）入面有成十間八間平民泰國餐廳，無論海南雞飯、串燒、咖喱定撈檬都咁正。

第二站－出海遊船河

碼頭邊有好多個檔仔棟晒牌喺度，寫晒有咩遊船河路線，睇怪石定海豚咁，多數100蚊之內有交易。Between，呢個牌大大隻字寫住「包你睇唔到珊瑚」係咩銷售手法…… 

毛毛揀咗個50蚊，首先坐船睇奇岩怪石，再喺橋咀島上岸自由活動，再睇返船班時間鍾意玩幾耐先返西貢碼頭嘅trip。 

出發喇！沿途船長叔叔會擘大喉嚨向大家介紹奇岩怪石，第一嚿見到嘅就係烏龜石，你搵唔搵到佢個頭喺邊先？

呢嚿四四方方嘅，船長叔叔就話似機械人喎～

仲有呢嚿，聽講係大象鼻石…… 睇唔出？即係你唔夠創作力量同幻想囉！

架船仔開到飛咁快，海風係咁打落面上，真係好爽！

沿途睇咗大概30分鐘怪石，就去到橋咀島喇。呢度潮退嘅時候兩個島仔會連埋一齊，遊客可以趁呢幾個鐘頭行出去影相～橋咀島唔算好大，行下影下相，大約一個鐘就可以玩晒。玩到差唔多日落，就係時候返去喇，因為多數船嘅尾班船都係6點半就開㗎喇。

第三站－食tea嘅時候又到咗

玩咗大半日，肚仔都開始餓喇～小巴站隔籬新開咗間賣魚仔燒嘅舖頭，20蚊有4件，邊行邊食就啱晒～

第四站－散步睇日落

碼頭隔籬有條長長大道，假期有唔少人帶埋狗仔嚟散步㗎，淨係見到啲咁打耳嘅狗仔，心情已經靚晒～

除咗放狗，都有好多人嚟西貢放風箏㗎！毛毛當日遇到呢個高手就放緊108超級大連環風箏蜈蚣！

海邊有一堆大石，坐喺度傾下偈，慢慢睇埋個日落作為西貢一日遊嘅總結，真係難得咁寫意。成日喺facebook呻冇錢去旅行，不如近近地嚟個郊遊日，舒舒服服咁relax下啦。