眾所9知，喺香港生活絕對唔容易。無論三四歲啱啱返緊幼稚園嘅細路、讀咗19幾年書嘅學生哥、定係三四十歲做咗幾廿年嘢嘅扮工人士，都一定諗過：「大雄就好啦，有叮噹幫佢。」雖然叮噹唔喺你身邊，但都總會FF下啲法寶去到你手會點用。「隨意門」、「時光機」、「如果電話亭」呢啲熱門嘢一定晨早畀人借晒啦，等毛毛幫你哋手諗下有咩冷門得嚟又好用嘅法寶啦～

登登登櫈～「禁食丸」

佢係一粒好好食嘅糖，但唔好睇佢細細粒，食一粒就飽到你食唔落一餐飯。呢樣法寶相當適合各位廢青毒L，我哋最大嘅願望就係唔使落街、唔使出房門、唔使落床就可以解決「食」呢個生理需求，連鼓起勇氣打電話叫外賣都慳返！唔錯……等毛毛試咗有冇效先再畀你哋呀吓。

登登登櫈～「分身槌」

太多嘢做唔完？用分身槌敲自己一下咪得囉！但係敲得愈多次，個分身就會愈淺色，能力亦都冇咁強。而家啲小朋友咁多興趣班要上，等毛毛敲晒全香港嘅細路，每個分身學一樣嘢，等佢哋有得落公園玩，感受下咩先叫真正嘅童年先，嘻嘻～

登登登櫈～「讀心頭盔」

頭盔呢樣嘢個個返工都戴住㗎啦，但識讀心嘅頭盔喎，好明顯係為扮工人士而設。老細成日都話「唔係要呢啲嘢呀，出去再做過！」當你問返佢：「咁……即係要邊啲呀？」佢都會一句「我要啲咩你唔知嘅咩！？」彈返過嚟。有咗呢樣法寶就慳返唔少腦汁喇！

登登登櫈～「吸雨機」

成日計劃好放假要去行山、去沙灘、去離島玩，但一落雨就KO咗成個假期，乜mood都冇晒……有咗佢，你就唔使再講「放假先嚟落雨，唔通連個天都唔鍾意我？」因為佢可以好似吸塵機咁幫你吸走晒啲雨水，然後扔落垃圾筒就搞掂！終於可以想去邊就去邊，唔洗帶遮出街，連天氣報告都唔使睇嚕～

不過有法寶又點⋯⋯毛毛最想要都係一個女朋友⋯⋯