詐騙集團無處不在，所以我哋要時刻提高警覺，以為畀騙徒有機可乘。今日毛Sir就要向大家分享一宗聞所未聞嘅詐騙案喇。

騙徒犯案手法層出不窮，唔好以為佢冇叫你交低金器畀佢祈福，或者冇話你個仔喺佢手上，佢就唔係騙徒呀。今次嘅疑犯利用楚楚可憐嘅外表、水汪汪嘅大眼睛減低事主嘅戒心，再進一步縮起肚腩仔，假扮成慘被遺棄、無家可歸嘅流浪狗，成功欺騙好心人嘅信任。

事後受害人影低罪証，傳送畀騙徒嘅主人，確定佢遇到嘅就係對方嘅狗狗，先至能夠揭穿為食騙徒嘅真面目。騙徒成功呃到目標早餐之後，就會原形畢露，變返隻水桶腰狗狗。

事件發生之後，騙徒嘅主人非常內疚，估唔到自己嘅狗狗咁冇家教，唯有喺Facebook發聲明向咁多位曾經畀狗狗呃走早餐嘅受害人道歉。

而騙徒就堅稱自己並冇特登行去受害人面前呃嘢食，而係咁啱遇到對方，仲表示以為受害人覺得自己好可愛先請佢食少少漢堡包，一切都係一場誤會…… 毛Sir就認為，呢隻狗狗咁醒目，的確係可造之材，不過下次搵食行遠啲，唔好畀主人知道呀嘛！

封面圖片、資料來源連結：粗脖子Mumu

睇埋：【呃飲呃食？】寫到出面，點捨得唔買嘢你食呀狗狗！