唔知係咪人人都會收埋一個充滿回憶同黑歷史嘅盒？裡面樣樣嘢都冇金錢價值，但喺我哋心目中就無可取代。

每次執屋都用好多時間，逐件拎出嚟睇，懷緬以前美好嘅時光，最後搞到執極都執唔完。

【學生證】

業都畢咗咁多年，都唔捨得扔嘅學生證。

雖然到而家都覺得張相好唔靚，但儲齊晒咁多張，見到自己由中一嘅幼嫩7頭慢慢演變成一位MK仔，都難掩心中嘅唏噓。

諗返起每年開學之前，會特登剪個靚髮、燙直件恤衫、練下點樣笑，都係為咗用成年嘅學生證可以好好睇睇。就算張相都而家已經花晒，自己個樣變得好模糊，但都會記得中學時期嘅自己。

【貼紙相】

考完試嘅指定動作，梗係唱完K再影貼紙相啦！

見到自己嘅打扮已經睇唔落，見到影相嘅甫屎都想死，究竟邊個加埋啲奇怪公仔，又係邊個過膠過到起晒泡泡...

不過，把口講到咁嫌棄張貼紙相，但每次拎返出嚟睇，個嘴角都自動上揚！

【舊戲飛】

每次睇完戲都要問人拎返戲飛，即使幾個月後，啲墨會甩晒，但都堅持要儲晒咁多張。

有時望見甩得七七八八嘅戲飛，就會估下究竟係咩戲，同邊個睇？之後就發現，就算唔記得電影內容，都會記得當時睇戲嘅情形，諗返起佢睇鬼片嚇到杯爆谷瀉晒／佢睇睇下肚痛痾咗半埸／佢...

多得張戲飛，令好多原本已經唔係好記得嘅小事突然湧現。

【生日卡】

無論係自己畫定卡通生日卡，每一張都係無價嘅。

可能只係輕輕寫咗「生日快樂」，又或者一班同學喺卡上簽名，但每一個都比facebook上嘅一句留言更彌足珍貴。

見到朋友嘅署名，雖然對方嘅樣已經好模糊，但都會記得以前一齊玩嘅時光。

（封面圖片來源：電影《西遊記第壹佰零壹回之月光寶盒》）