日本仔整嘅超迫真食物模型似到你明知佢係一嚿膠，但見到都一樣會流晒口水就係人都知啦，以前就淨係得日本料理門口個櫥窗會擺啲偽拉麵、偽滑蛋豬扒飯，而家佢哋已經發展到連飾物都用呢啲超迫真食物嚟整㗎喇！

用甜品或者水果整飾物呢個idea都唔錯呀，妹豬最鍾意就係食甜嘢，明明食完放題都仲話可以用第二個胃擺甜品嘅～而家用埋嚟整飾物，擺到成身都係，連個人都sweet埋，仲好似有陣香香甜甜嘅味咁呀～

之不過，偽甜品飾物咁common，又點滿足到日本仔將唔同嘢食擺上身嘅心呢？最近日本新出咗款意粉頭飾呀！肉醬意粉又得，蕃茄意粉又得，卡邦尼意粉都得，得咗。

日本有咁多好嘢食，淨係意粉又點得呢？呢個睇得唔食得系列仲有其他日本料理，好似沙律、冷麵同大阪燒咁，360度睇都咁迫真，戴住佢行出街會唔會無啦啦引咗堆雀仔飛埋嚟係咁啄㗎？Between，個大阪燒頭飾驚你冇叉用仲特登畀埋個叉你，又幾細心啵！

除咗頭飾，仲有頸鍊畀你戴出街搶fo，價錢由6000円起。唔好睇呢啲飾物大件夾唔抵食呀，好多都已經賣斷市！就嚟Halloween，唔知擺啲擺明係假嘅血滴喺面驚嚇啲，定擺啲超迫真嘢食喺頭驚嚇啲呢？

「食品サンプルの㈱畑中」さんが制作しているアクセサリー。私にはわかりませんが、sold outが続出中。欲しい方は急げ！https://t.co/2ki3NZp23j pic.twitter.com/ekuXDcLq7l

— 合田ノブヨ (@goda_nobuyo) October 9, 2016

封面圖片、資料來源連結： goda_nobuyo／twitter、ii-fake