每次打開信箱，見到朋友旅行時寄畀自己嘅明信片，都會覺得感動。物輕情義重，雖然明信片嘅重量唔多過30克，但載住嘅係朋友喺外地對自己嘅思念。

 

要寄明信片唔使去到外國嘅，喺香港過緊扮工生活嘅你，其實都可以喺香港寄返張屬於香港嘅明信片。

 

書信情懷

「同電郵唔一樣，你要用更多嘅心機去寫一張明信片；有時仲可以識到唔同嘅筆友，佢哋可能會無啦啦寄塊樹葉畀你，雖然唔係咩貴重嘢，但收到都好窩心！」

 

機緣巧合下，Ivan遇到Postcrossing－一個交換明信片嘅網站，令佢重新執返起枝筆，喺冷冰冰嘅科技世界，拾回書信嘅熱度。

 

花時間寫一張明信片，留底嘅唔止係筆墨，而係情感上嘅交流。

 

去到開自己嘅cafe，工作漸忙，Ivan都冇放棄寫明信片嘅衝沖勁，同多位熟客仔交換地址，去旅行時都不忙寫返幾張過下手癮。

 

本土明信片 

 

啱啱開始玩Postcrossing嘅Ivan，仲未開始有自己印製嘅明信片，唯有喺淘寶同埋普通書局買住嚟「頂檔」。

 

「但真係好唔靚吖嘛，嚟嚟去去都係大佛呀、天星小輪，啲相都唔知有冇十年前...」

 

十年間，香港嘅轉變，大家有目共睹，皇后碼頭拆卸、維港愈變愈窄、街上充斥水貨客，究竟而家嘅香港，仲係咪好似明信片上咁風光明媚？

 

「你話呢...細個嗰陣係見英女皇，而家...」

 

以前見開嘅紅色郵筒已經成為回憶。

 

Ivan笑指就算景點冇變，但香港人生活嘅轉變卻非常大。

 

「我前排搬返由細住到大嘅天水圍，發覺乜都畀領匯收購哂，想搵間文具舖都冇。其實，有好多以前習以為常嘅事已經唔存在，就好似十幾蚊一個M記餐都冇咗好耐啦...」

 

或者香港嘅商業化係特色，但香港人嘅生活先最可以代表到香港，Ivan希望可以留住大家日常生活嘅細節。每人眼中嘅香港都獨一無二，唔可以只用幾個地方將香港定型。

 

香港人有幾可見到就到維港夜景？但街頭小食、茶餐廳等等，就充斥喺我哋生活中。

 

就算係玩都要認真，為咗香港可以有更多代表性嘅明信片，Ivan同幾個中學朋友，聯同幾位識設計同學，設計印刷唔同嘅本土明信片，喺旺角嘅格仔舖寄賣，從2012年開始慢慢「搞大件事」。

 

 

同一般明信片大相逕庭，Ivan話其實好多嘢都可以做香港嘅明信片，只要係對香港人有關。對於設計師嘅作品，Ivan嘅要求得一個，只要說服到佢係集體回憶就可以，一棵樹一枝筆都冇問題。

 

「啊...另外一個簡單條件，就係一定要係香港人。香港人設計代表香港嘅明信片，同其他人講香港嘢。」

 

明信片日漸式微，Ivan認為自己更有責任去傳承。喺機械化嘅香港，堅持為大家帶嚟更多貼地嘅明信片，將大家對香港嘅集體回憶蔓延下去。

 

回憶保存

 

明信片不只係生意，仲係紀錄嘅重要工具。

 

雨傘運動其間，Ivan同拍檔偕同攝影師朋友，自資印刷十萬張佔領嘅明信片，喺金鐘海富中心派發畀佔領人士，短短幾日就派完。

 

 

「我哋只係想大家永遠記得呢件事。」

 

冇從中謀利，冇販賣同情，只想記錄大家曾經為咗保存香港嘅核心價值而奮鬥。

 

除咗旅客之外，亦都有唔少香港人會買返香港嘅明信片嚟收藏，比例甚至去到一半一半。

 

「我哋都有文化上嘅義務，如果將呢啲回憶記低變成明信片，大家就可以喺回憶未消失前，關注到身邊嘅事同物。」

 

宣揚郵寄精神

 

幾個月前，Ivan同朋友喺灣仔開咗一間以航海為主題嘅cafe。

 

除咗寄賣明信片外，仲提供不同工具畀食客「即席揮毫」，寫返張明信片畀自己或者朋友。

 

 

1:1嘅ER郵筒呀！寫完再放入郵筒，Ivan佢哋就會定期將郵件寄出

 

Ivan笑言希望可以感染更多人認識本土明信片，重新認識「新得嚟又有啲舊」嘅書信。而「香港郵意」亦會積極推出唔同形態嘅明信片，同埋請願香港郵政局改革，令大家知道原來寄嘢都可以咁好玩！

 

香港郵意 明信片主題咖啡廳

地址：香港灣仔安樂里1號地下D店