呢部電話，表面上係一個大哥電話，但實際上，佢係一個鬚刨。而風筒呢，其實又係鬚刨，點知皮鞋呢，原來又係風筒，認真鬼馬。

呢啲咁騎呢嘅科技，喺戲入面就見得見啦，仲好過癮?，不過如果係喺現實發生，原來可以好大鑊㗎！

通常廁所門後面都會有個小掛勾畀人掛手袋嘅，因為以前常見嘅掛勾位置太高，試過有賊仔趁人方便嘅時候一嘢跳起，伸手入去搶走個手袋，所以後來就出現咗黐得低一啲嘅掛勾喇。不過點低，都唔會低到一掛手袋上去就掂晒地啩？最近台灣有個女學生話佢同學喺學校廁所發現咗個好奇怪嘅掛勾，個位置低到出奇，所以佢哋就掹個掛勾落嚟睇下喇。

點知呢個掛勾真係有古怪！佢右上角有個疑似前置鏡頭，拆開之後，竟然仲見到入面有開閞掣、usb插頭同電池！佢哋發現呢個驚天大陰謀之後就立馬拎個掛勾畀老師報警處理喇！呢個蠱惑的勾原來係攝錄機嚟，黐嘅位置咁低，就係為咗可以啱啱好對正私人部位偷拍，老師仲話入面有成3個鐘頭嘅錄像?呀！

竟然喺學校入面偷拍咁變態，罰佢做掛勾就啱㗎喇！大家去廁所或者試身室都要小心啲，覺得有可疑就要出聲呀知唔知呀！

封面圖片、資料來源連結：dcard