香港雖然唔大，但有時去到其他區都覺得好似去咗個小旅行咁，所有嘢都變得好新鮮。今次毛毛就搵咗三幢建築物，等大家睇下知唔知喺邊啦！

油麻地停車場

平時去開油麻地嘅你，未必抬頭發現，原來有條天橋係穿過成幢大廈。

加士居道天橋喺1977年開始啟用，其中有一段路面係穿過油麻地停車場大廈，成個畫面就好似《食神》中唐牛個身穿咗窿咁。

根據之前嘅報導，有堪輿學家話，由於天橋貫徹整幢大廈，所以打通咗陰陽界。亦有好多司機大佬都話曾經夜晚晚瀨過嘢，甚至寧願選擇兜路行都唔過天橋喎。

屯門妙法寺新綜合大樓

如果你有試過搭西鐵去屯門，一定會見過妙法寺新綜合大樓，一幢現代大型建築物座落喺古色古香嘅「妙法寺萬佛寶殿」隔籬，即刻形成好大嘅對比。

每一次都會有朋友好像發現新大陸咁問：「呢幢咩嚟㗎？」

認真諗，究竟大樓入面有啲咩呢，今次就問問Google大神啦！

原來裡面除咗有玻璃佛殿，仲有圖書館同演講室畀一眾善信享用，而且現代嘅設計係為咗日後方便維修同保養，所以先會同萬佛寶殿咁格格不入啫。

尖沙咀福德古廟

喺充滿自由行、名店林立嘅尖沙咀，竟然有間成百年嘅古廟隱藏喺巷仔之間！

平時行經海防道都係急急腳去海港城，又有幾多人留意到原來臨時街市隔籬有個小入口，通往福德古廟？

其實，福德古廟喺1900年已經喺現址，以前係畀碼頭工人同附近嘅街坊供奉嘅。就算尖沙咀喺呢百年間變咗好多，但古廟仍然默默地保佑大家。

每一區都有唔同特色嘅建築物，有時我哋唔知道，只係我哋從未認真咁去發掘！