毛毛嚟問你，我哋平時最鍾意食嘅係咩？白飯？唔係呀！死貓？喂搞清楚先，食得多唔等如鍾意食喎。我哋最鍾意食，又食極都唔想停嘅，就梗係花生啦！

估唔到原來倉鼠仔都一樣好鍾意食花生㗎，仲鍾意到會收埋一大堆喺口腔兩邊，所以佢哋塊面珠咪成個波咁漲卜卜囉。日本有隻倉鼠仔畀佢主人帶咗去睇獸醫剪兩隻門牙仔，點知醫生一反轉佢個身，個嘴仔就開始有花生吐出嚟喇！

1粒…2粒…30624700粒…嘩，吐極都有嘅喂？睇唔出你倉鼠細細，收收埋埋咁多花生喎！正宗花生友仲唔係你？！

吐咗成10幾粒花生出嚟，獸醫終於可以開始幫佢剪牙仔喇，啪啪啪…嘅畫面就冇喇，因為只係用指甲鉗啪一下就搞掂㗎喇！原本長到就嚟叉出嚟嘅門牙仔修返短少少，即刻靚仔晒！

唔知佢係咪見反正10幾粒花生都冇晒喇，唔差在豁出去，終極一吐，吐埋最後一粒大花生出嚟晒冷！

不過倉鼠仔可能因為被迫吐晒佢珍藏嘅花生出嚟所以有啲傷感，又諗起成日要陪主人寫日記嘅悲慘身世，悲從中來，突然有啲眼濕濕。唔好咁唔開心啦倉鼠仔，聽日一定會食到更多花生㗎，係唔係呀，哈姆太郎？

獣医さんのハムスターの牙の切り方みたいな動画YouTubeで見つけたんだけどハムスターのキャラも獣医さんのキャラもくそうける pic.twitter.com/uohFDmphML

— たかあら (@tetsu_0114_bass) October 1, 2016

封面圖片、資料來源連結：tetsu_0114_bass／twitter