Woohoo！期待咗咁耐，真真正正嘅秋天終於出現喇！唔使毛毛多講都知，秋天涼涼地，最好就係整幾味小食去野餐啦～上次教整醉雞翼嘅時候都同大家講過，野餐小食最大嘅原則就係要「擺凍咗食都仲咁好味」，今次就一齊整韓式拌菜啦！

話明係拌菜，主角梗係菜啦！毛毛今日去街市姐姐話呢款矮腳白菜靚，所以就買咗喇，不過用菠菜、白菜仔、芽菜都一樣得㗎，而調味料就主要用麻油。

話晒對咗陣都有感情，我怎可以～一刀劈下來～親手傷你～對唔住喇菜菜子，毛毛要將你切開一半喇！

然後就將白菜放入滾水煮分幾兩分鐘～

煮熟之後就過個冷河先！毛毛畀個貼士你呀，用冰水浸嘅話，啲菜個口感會爽脆好多㗎！

呢個畫面潔癖人士請勿觀看，就係用手輕輕力揸返啲水出嚟喇。好核突咩？你有冇聽過人哋整紅酒啲葡萄都係用腳踩㗎！

然後就落少少鹽、芝麻、麻油撈勻佢，想香口啲嘅朋友仲可以落啲蒜蓉同豉油?～

完！成！呢款韓式拌菜即食又得，雪凍又得，得咗！香港嘅秋天秋來也秋去，好快就會沙唷啦嗱，大家要把握機會快啲去親親大自然啦～