一、跑樓梯大賽

最近，喺名校Secrets嘅Facebook專頁上面見到，有同學仔學校舉行咗跑樓梯大賽。毛毛覺得奇怪⋯⋯呢個比賽唔係每日都舉行緊㗎咩。

毛毛日日都要趕喺班主任入班房之前，由一樓行到五樓，每日都係一個驚險嘅賽事嚟㗎。

二、紙飛機比賽

物理堂必備課外活動，紙飛機比賽。一個合法畀同學們集體放飛機嘅日子！

比賽之前阿Sir都會出盡奶力咁以力學解釋，到底點先摺到架好嘅飛機。其實，同學仔們都係亂L摺㗎啦～阿Sir不如即刻開始啦～

三、雞蛋降落傘比賽

回想起當年係操場落個場雞蛋雨，真係觸目驚心。個個同學都以為自己個降落傘好安全，一放手，啪啪啪啪啪啪啪啪啪啪，之後成地都濕噠噠，仲有啲腥?⋯⋯

毛毛好想同阿Sir講，不要玩食物。

四、班際跳大繩

跳大繩，可以係一項好危險嘅運動。身體嘅郁動雖然唔算好激烈，但心臟嘅跳動絕對係好劇烈。因為跳緊繩嘅同學每一秒都好驚會仆！

就算你自己唔會kick倒，隔離嘅同學kick到都有機會拉跌你，然後就一堆人瞓晒喺地下。

不過最7莫過於，一個累全班！個個都跳過曬，得你一個⋯⋯

毛毛自爆先，細個最佳紀錄係兩下，一下跳，一下仆。

五、閃避球比賽

又名班際了結私怨比賽。有牙齒印嘅同學們將會使盡渾身解數，喺呢場比賽裡面狙擊隔籬班唔鍾意個位同學，務求要令到佢哋塊面食個大波餅。

如果同隊入面有鍾意嘅女同學，呢場比賽就係你英雄救美嘅時候喇。

機會嚟喇，飛雲！

六、全校捉迷藏

捉迷藏係唯一一個非官方認可嘅非正式學校比賽。

毛毛試匿匿下匿到天黑，以為我贏咗啦，點知啲同學原來唔記得咗毛毛，已經返曬屋企。後尾仲要叫工友嬸嬸開閘放毛毛出去。

實驗室、家政室、木工室都暗藏危機㗎，玩個時真係要小心啲呀。