無論小學、中學定大學，總有啲同學仔好曳豬，成日整蠱其他同學仔。佢哋嘅手法層出不窮、創意無限，你永遠都估佢哋唔到……

【踢走一隻鞋】

著過拖鞋或者就咁笠落去嘅鞋，都一定試過一個唔留神就畀人踢走其中一隻鞋，仲要當佢係足球咁，愈踢愈遠……
話明係足球，有前鋒，又點會冇中場同後衛。佢哋好似真係踢緊世界盃咁，你一腳我一腳，世界級嘅陣營、仔細嘅分工，只係為求你冇機會再著返隻鞋，睇住你單腳咁追住個波……唔係，係隻鞋，就最開心喇。

【反轉個書包】

你以為書包呢樣嘢冇咩好玩，應該好安全至係？咁你就大錯特錯喇！
當你小息去完個廁所返嚟，見到個書包嘅顏色好似有啲唔同咗咁，望真啲……
喂！做乜底面反轉咗嘅？然後你好嬲豬咁拎起個書包，竟然發現整蠱專家傳人將你入面嘅嘢放返晒喺原位。嗰一刻你有啲嬲唔落，反而好佩服佢咁短時期竟然做到咁多嘢。

【老師黐粉筆】

唔好以為同學仔先會成為受害者，曳豬同學仔真係乜都夠膽死玩，連老師都唔放過。
喺轉堂嗰時佢哋已經準備就緒、蓄勢待發，喺老師張櫈同埋會挨住講書嘅地方塗滿粉筆碎。一上完堂，老師成個背脊同屁股都七彩繽紛，好似去完colour run返嚟咁……
毛毛提提你，不要玩老師。

其實你好清楚一嬲、一憫陣、一谷氣，就會中咗佢計。
所以畀人整蠱，最緊要係要沉住氣，扮到若無其事，千祈唔好畀任何反應佢，等佢乜癮都冇晒你就已經贏返晒啦。
此風不可長呀！