有啲傷害同陰影，係一世㗎⋯⋯細細個睇過嘅鬼片，到而家仲記憶猶新呀。

X，講還講唔好貼相，諗返起又好L驚喇。

一、午夜凶鈴

一頭黑色嘅長髮，一身純白嘅布裙，佢可以係女神嘅化身，同時可以係你最唔想係夜晚遇到嘅人！

睇完嘅貞子嘅人，應該有一段時間都唔敢望住部電視，因為你總會形住佢由電視機爬出黎。

以前嘅大牛龜電視就話可以收埋佢，再畀佢爬出嚟啫，而家部部電視都LED，應該好啲掛？

啊，仲有，佢個對冇手指甲嘅手都好L恐怖⋯⋯⋯⋯

二、恐怖蠟像館

通常個名都叫得恐怖兩個字，你有心理準備入去睇就會冇咁驚，但毛毛當年睇，都仲覺得好鬼恐怖？

嗰個爛面嘅殺人魔雙胞胎，同埋佢哋將人殺死再做蠟像嘅血腥手法，真係令人好想嘔。

毛毛好記得有一幕，女主角喺坑渠底伸隻手指出嚟，之後畀殺人魔拎個虎鉗剪斷咗⋯⋯

自此之後，毛毛就聽媽媽話，冇再立亂申隻手指入坑渠喇。

P.S. 香港山頂個蠟像館喺呢套電影放映同一年重開，毛毛到而家都未敢再去。

三、陰容宛在

有乜恐怖得過喺戲院到睇一套關於戲院嘅鬼片？！

你以為隔離坐嗰個係人咩？偏偏唔係！你以為套戲院咗咩？偏偏未完！

貞子都話喺個15吋嘅電視機仔爬出黎，大佬，戲院個Mon幾咁大呀⋯⋯恐怖好多喎。

嗱，呢個故事教訓我哋，好似主角咁喺戲院偷拍，就會好似佢咁慘㗎喇⋯⋯

四、驅魔人

記得當年推出嘅時候，正正係ICQ喺香港普及嘅年代。毛毛嘅一位小學同學，將呢套電影嘅Trailer腥畀毛毛！毛毛驚到即刻熄L咗電腦總制！

雖然驅魔人劇情唔算恐怖、血腥，但喺電影配樂同成個氣氛營造到好詭異，令人不寒而慄⋯⋯而驅魔人更加榮獲美國AMC電視台「最佳百大恐怖電影瞬間」嘅第三位！

要講成套電影最恐怖嘅瞬間，莫過於嗰嗰畀魔鬼附身嘅妹妹仔大叫。唔知邊個天才網民，將佢嘅樣剪接成嚇人網頁，相信你都中過招！！！

最後一名，十級恐怖，夠膽就拉落去睇。

↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓↓

五、鬼馬小靈精

好啦好啦，你好大膽喇⋯⋯