2016年10月20日 星期四
【好青春呀】超強學生用memo砌Pokemon課室佈置
中學時代其中一件最青春嘅回憶，一定係佈置課室。成team人夾手夾腳又去文具舖（而家都冇晒喇…）買紙，又要搬枱搬凳爬高釘紙，雖然係幾嘥時間，不過整完企喺黑板前面望返去個壁佈板，又真係好有滿足感嘅，最正係可以公器私用，整自己鍾意嘅主題呀嘛！
最近台灣就有幾個超強學生同老師一齊用平時大家寫兩寫就扔咗去嘅Memo紙，好有心機咁佈置課室喇！Memo紙細細張，要黐滿成幅牆已經唔簡單，佢哋仲要design埋Pokemon主題呀！拼咗大大個精靈球同卡比獸之餘，仲寫埋句「Catch your dreams」，成件事真係青春到喊呀！有個肯陪自己癲嘅阿Sir，佢哋嘅中學生活一定好開心！
呢啲咁熱血嘅事，又唔一定得學生時代先會發生嘅，識得玩，其實返工都可以好好玩。
今年5月，紐約有條街嘅公司展開咗Memo大戰，成班打工仔用Memo喺玻璃窗砌唔同句子同圖案出嚟，估唔到公司會收埋咁多高手中嘅高高手！所以話，創造力量同幻想真係會嚇你一跳㗎！
封面圖片、資料來源連結：Hsin Chieh Lu
