對主子百般遷就，咩都聽晒佢話，好明顯係奴才嘅本份啦。不過唔知當一個聖上遇到另一個聖上，雙雄相遇，大家都唔肯讓步嘅時候，又會點呢，江山從此多事了……

嘩情況同大家諗嘅一樣咁混亂呀！話說最近日本有兩個主子為咗爭飯食而大打出手呀！奴才話右邊嘅主子近排唔知點解學壞咗，養成等食飯嘅時候望實兜飯，但隻手就對隔籬隻主子拳打腳踢嘅習慣！

更正！原來唔係兩個主子大打出手，而係……一個主子畀另一個主子毆打呀。右邊怒出喵拳嘅主子嬲到黑都面晒，隔住個mon都感覺到佢幾飢餓，奴才都係企開少少明哲保身好啲。

而左手邊硬食咗一拳嘅主子佢氣場都唔弱，塊面都黑咗一半，但唔排除主子會因為畀奴才影咗相放上網而黑面指數急升。

奴才，你以為主子淨係出拳打另一位主子你就咩事都冇可以坐定定，好似後面嘅啡主子咁食花生咩？一日最衰都係你唔買多幾個罐罐畀主子隨時享用呀！總之咩都係奴才嘅錯！你都食返一拳啦喵！！！

封面圖片、資料來源連結： i_poti／twitter