每次有親戚上嚟屋企，阿媽都會叫毛毛執好間房，唔好成個狗竇咁失禮人，其實亂咪亂囉，關人咩事喎，佢哋又唔係要坐上我張床食飯…… 毛毛都算係一個「唔係打風焗住留喺屋企都唔會執房」主義者，不過畀我見到呢間房，都忍唔住想叫個主人執執佢呀。

日本有個無業廢青公開咗佢間房畀大家睇，嘩，亂到呢…… 一盒二盒模型就嚟疊到天花板咁高，個雜物架有倒榻危機又唔理，今次真係毛毛都幫你唔落呀，連想話「亂中有序」都嫌自己個大話太大呀！

不過垃圾崗咁樣樣嘅房好多人都有啦，之前台灣網民仲發起過一個叫「房間超亂生死鬥」嘅比賽，畀大家鬥亂呀！

毛毛有理由相信，一地都係嘅衫唔係衫咁簡單，而係混雜咗著咗一日嘅衫、著咗三日嘅衫、著咗一個星期嘅衫，同埋上年冬天著過但因為冇出汗面冇洗到，擺到今年嘅衫…… 

隔住個mon都好大陣臭味傳入我的鼻呀！毛毛就嚟嘔㗎喇，我一嘔，就冇人可以阻止到我！

垃圾崗唔係一日鍊成嘅，唔知咁多位網民間雜物房，又用咗幾耐搞到間房咁亂呢？有個媽咪就表示其實唔難，因為只要屋企有咗小朋友，就肯肯定會成個狗竇咁啵。不過好似毛毛咁嘅廢青，間房亂就一定係因為自己懶㗎喇，點會係因為有BB咁幸福呀……

封面圖片、資料來源連結：2ch、第二屆房間超亂生死鬥