唔少人都會喺屋企裝個Webcam，方便自己隨時睇到寵物或者BB嘅一舉一動嘅，如果有咩意外發生，都可以第一時間知道吖嘛，有時仲可能會影到啲搞笑片段?！但係一唔小心，Webcam都可以係罪惡嘅溫床嚟㗎！

台灣有個媽媽話佢喺BB出世之後，喺強國買咗呢部Webcam返嚟，大概用咗三個月啦。 

就喺上星期四，佢好似平時咁坐喺床上面抱住BB餵哺母乳，而大女就坐喺佢隔籬睇電視。個cam突然傳咗把男人聲出嚟喎，但係因為個電視太嘈所以佢聽唔清楚講咩，仲同大女講：「爸爸同你講嘢呀」，之後又對住個cam話自己聽唔清楚，叫佢講多次。點知呢個時候，個cam竟然話「我唔出聲你都唔知我喺度睇你餵奶咩？」媽媽嚇一嚇，立馬用紗布巾遮返住胸部先，再打畀老公問下佢有冇用cam睇佢哋，但老公都話冇呀！

一諗到一個媽媽餵母乳嘅過程竟然畀變態佬監視，真係好心寒！咁多位有喺屋企裝cam嘅朋友真係要小心呀，專家話最好裝返防毒軟件同定期轉密碼，唔用嘅時候仲要遮住個鏡頭佢！聽講而家有啲專播愛情動作片嘅網都會自動開咗你手機或者電腦個前鏡頭，影低晒你睇片嘅反應再勒索要錢㗎！好彩毛毛一早用貼紙黐個前鏡頭啫，大家都要小心至上呀！

封面圖片、資料來源連結：爆料公社

延伸閱讀：【唔L係啩】廁所掛勾竟然係攝錄機 仲要對正私人部位！