香港嘅小食多到數都數唔晒，不過講到經典中嘅XO，一定有腸粉份。嗱，毛毛唔係講緊茶樓嘅蒸腸粉，而係請緊企喺街邊用竹簽拮嚟食嗰啲豬腸粉呀！幾蚊就有交易，又夠晒飽肚，不過就算係平嘢，都一定要有要求，咁先算係識食嘅毒L。毛毛一於走勻港九新界，搵咗各區最出名嘅腸粉食畀大家睇！

有人話成碟腸粉，主角其實係混醬。以毛毛食咗廿幾年腸粉嘅經驗得出，腸粉帶畀我哋口感，混醬就提供味道，如果齋食腸粉，咩癮都冇，齋食混醬呢，又冇意思，所以兩者嘅配合簡直係perfect match ！

港島區代表：灣仔克街腸粉皇

招牌大大個字寫住「腸粉皇」，一間小食店竟然自己稱皇咁把炮，應該有返咁上下水準，好，老闆，10蚊腸粉呀唔該！

混醬味都算香濃，但腸粉唔算特別香滑，亦唔油潤，有少少失望。希望呢一切只係因為個「皇」字加上10蚊4條嘅高價令毛毛對佢抱住太大期望而造成嘅落差。

價錢：10蚊4條

九龍區代表：深水埗合益泰

呢間腸粉出晒名多人排隊，唔少人都會即買即企喺隔籬條巷仔食，夠晒風味，想舒服啲嘅當然都可以坐入去舖頭慢慢歎啦。

未食已經聞到一大陣好獨特嘅香味搶閘咁衝入鼻，一食落去，眼前就有兩隻大字好似電影credit咁升起，而呢兩隻字，就係「香滑」。冇錯喇，原來呢種香氣，係燒蠟油嘅香氣呀！幾蚊就可以食到咁高質嘅小食，唔怪得之咁多人排隊啦！

價錢：7蚊4條

新界區1號代表：大圍坤記

唔好睇佢舖仔罨罨耷耷，其實係區內出名嘅小食店！呢度嘅腸粉好似有生命力咁，鮮活油潤，一啜入口隨即滑入喉嚨，嘴裡面就充滿住混醬嘅香濃味道。

毛毛特別欣賞佢嘅麻醬，晶瑩而流暢，唔會稠到漿住個嘴，又唔會稀到死氣沉沉，簡直係成兜腸粉嘅生命泉源！

雖然呢度冇冷氣，夏天坐喺度食熱辣辣嘅腸粉真係會熱到傻，不過由於太好味，毛毛依然會特登兜路過嚟自己啪晒成兜腸粉。

價錢：11蚊6條

新界區2號代表：粉嶺四眼仔

本來毛毛就淨係諗住每區寫一個代表嘅，不過聽人講粉嶺都有間腸粉排晒隊，咁又點可以唔去試下呢！

第一啖食落去，豉油帶少少酸味，扣咗幾分。味道屬於中上level，但如果同深水埗比就稍為冇咁香滑，如果落多啲麻醬可能會好食啲。

價錢：6蚊4條

總結：可能你會話毛毛戴頭盔，但口味嘅嘢，真係人人唔同，如果你有咩心水都歡迎話畀我知！毛毛係一個終極腸粉怪，由細細個買5蚊6條，食到5蚊5條，再到而家5蚊3條，心入面難免有啲唏噓。希望香港可以留返個生存空間畀呢啲細舖頭，毛毛唔想過多幾年食幾條腸粉都要廿蚊。

延伸閱讀：【毒L識食系列】