明明係同一個game，口講就叫「捉依因」或者「伏匿匿」，老師就話寫書面語要叫「捉迷藏」，而台灣呢，又興叫做「躲貓貓」。毛毛除咗搲爆頭都唔明咩叫「依因」之外，最唔明就係點解一定要「躲貓貓」唔可以「躲狗狗」，不過睇完呢條片之後，終於搵到答案喇！

日本有網民喺路邊咁啱見到有兩個喵星人玩伏匿匿，於是就停低觀戰喇！最開頭右邊嘅喵星人（見佢有半個身白色，叫住佢小白先）匿咗半個身喺坑渠入面，引到左邊嘅喵星人（全身橙色，叫住佢小橙先）跑過嚟捉佢之後，佢又即刻瓹入坑渠穿去另一邊，等小橙得個桔，幾鬼馬呀！

第二回合，攻守雙方互換位置之後，小白又用返同一招，突半個頭出嚟吊小橙癮，不過橋唔怕舊，小橙真係擺定姿勢準備出擊呀！

大家返到本身個位，小橙再次進撃失敗呀！佢唔知係老羞成怒、老貓燒鬚、定唔好老脾喇，竟然衝過去對小白直線抽撃！小白見佢唔跟規矩，最後就一嘢跳走唔同小橙玩喇。唉，贏咗場交，輸咗個FD，又何必呢！下次講明上捉上、下捉下咪好囉！

待って。
これやばない？
めっちゃ可愛くない？ pic.twitter.com/rpkyVCThwA

— いとう@TAKUBINGO (@ikasazu0104) October 30, 2016

封面圖片、資料來源連結：ikasazu0104／twitter