2016年10月31日 星期一
【好有童真】老竇勁有心機將屋企佈置做萬聖節主題
講到慶祝Halloween，九成人都會同班fd開party，或者落老蘭癲返晚，有邊個會話返屋企同老竇老母食南瓜大餐㗎？可能台灣呢個老竇就係想乖女陪佢過節，唔好去party識死飛仔呀，所以就勁畀心機將屋企佈置做萬聖節主題！
飯廳呢幅牆貼滿晒蝙蝠，唔講仲以為係蝙蝠俠fan屎嘅傑作呀～
除咗2D蝙蝠，仲有幾隻3D蝙蝠吊下吊下咁，食食下飯企起身想裝飯畀佢撞到個頭都咪話唔驚！Between，隻杯緣子小姐係無辜㗎！
行到客廳，黑色一點點嘅唔係霉炭屎鬼，而係蜘蛛嚟呀！咁鬼多隻，一過咗萬聖節真係見到都眼冤呀，睇你到時點執……
喺角落頭仲有一個大蜘蛛網，第日封咗塵就真係唔慌冇真・蜘蛛網喺上面喇！聽講下面幅蒙娜麗莎都係老竇特登新買㗎，喺另一個角度睇就會變成骷髏頭，唔聲唔聲嚇你一驚！
老竇呀，萬聖節黐幾隻黑貓仔做裝飾都理解到呀，但下面隻七彩顏色嘅龍王三太子又有咩喻意先？係咪諗住順便整埋龍舟for端午節呀？仲有成半年先到喎……
不過老竇咁畀心機佈置屋企，又係幾抵讚嘅！諗返起細細個，咩節目都係同屋企人慶祝嘅日子，都幾溫馨呀，等毛毛今晚返去問老竇trick or treat先！
封面圖片、資料來源連結：dcard
【萬聖節系列】
