因為得到自由，所以追求更大嘅自由。

毅然辭職唔做青少年外展社工、孭起背囊到伊朗同中亞五國出走151日。呢份衝勁，可能對好多人嚟講係遙不可及，但為咗見一個更大嘅世界，In決定放棄一切，踏上旅途。

佢叫In，呢個係關於旅行嘅故事。

 

獨遊嘅意義

 

由細到大都好動嘅In，十二年前開始第一次獨遊，一試就愛上。雖然試過喺柬埔寨嘅貧民區，畀四、五個?仔推低搶嘢，又試過截順風車遇人不淑，但都冇削弱到In獨遊嘅心。

 

「遇到唔好嘅事咪當學精啲囉！」

 

只求順利快樂，其實無咩可能。而克服困難，就可以睇到更多風景。於是，講起獨遊有咩好，In就滔滔不絕咁列咗一大堆好處。

例如鍾意去邊就去邊，最緊要嘅，係可以多啲接觸當地人。

 

「之前去伊朗，一個月內試過住喺九個Homestay，有好多當地人帶我去唔同地方飲飲食食。」

旅行，如果唔想走馬看花，可以選擇融入。為咗拉近同當地人嘅距離，In每次去旅行前，都帶唔同嘅「手信」，就好似氣球、即影即有同香港明信片。

 

送禮，唔在乎貴。一份小小心意，係話你知：我會記得你，都希望你記得我。

回憶，係出走最大嘅營養。

當地人見到香港嘅紙幣都忍唔住要影低，In都畀咗張十蚊紙佢哋留念。

好少機會接觸到即影即有，當地人非常好奇，一擁而上。

獨遊嘅路途上，In都接觸到唔同志同道合嘅旅人，有時一齊踩單車，有時一齊搭順風車。

來自阿根廷嘅伯伯，已經踩咗八年單車環遊世界喇！

 

勞役自己換風景

本身係毅行者嘅In，喺香港都做開運動，去到外地更加唔會放過呢個機會。

第一次踩住單車去旅行，係由拉薩踩到珠穆朗瑪峰，踩咗足足九日。出發前，In仲喺西藏爬咗六千米高嘅雪山。

 

「用自己嘅汗水去換取風景，最尾去到目的地真係特別感動㗎！」

 

身處雪山都熱血到出汗，呢啲過程，其實係畀自己嘅禮物。

鍾意用自己嘅腳步欣賞風景，仲可以感受到不同嘅風速，同自己急促嘅心跳聲。

 

「最唔方便就係搵廁所喇，又要搵個隱蔽嘅地方，又要看住啲行裝...」

 

自己一個喺野外踩單車同行山，如果遇上「大姨媽」，In仲要將用過嘅M巾收喺背囊，直至搵到垃圾桶?！

 

不過，講到最痛，就係行山遇上水泡，仲要係成隻腳都係，每行一步都係煎熬。

 

「痛會逼我行快啲，因為喺山上，只有行完先可以脫痛海！」

 

連行幾日山，對In嚟講又愛又恨，係最辛苦同最鍾意嘅環節。

 

鍾情偏門國家

In曾經造訪伊朗及中亞五國（哈薩克、吉爾吉斯、土庫曼、塔吉克及烏茲別克）。對於伊朗，更加係一見鍾情，總共去咗兩次。

人與人之間嘅溝通，語言其實只佔7%，而身體語言就佔咗93%。

就算喺語言不通嘅地方，In都可以感受到當地人嘅熱情。

 

「佢哋見你一個人咁慘，都會同人招手，問你食唔食嘢，有冇地方住，甚至有人見到我架車爆胎，問我有冇錢整⋯」

 

In親眼見證，每個國家，都唔只得一面。

伊朗嘅住家菜，令In肥咗成十磅！

伊斯蘭教徒信奉一位穆斯林詩人，相信接待外賓係一家人嘅榮譽，所以有咩都會將最好嘅畀客人。

 

「佢哋面紗外睇落好cool，但一除低面紗，熱情到你估唔到！」

 

伊斯蘭教徒一日要禮拜五次，以前係拎一大本嘅可蘭經。科技日新月異，而家只要下載App，就可以對住部電話做禮拜。

原來，中亞國家可以係咁有趣。

 

返香港叉一叉電

去旅行去耐咗，會覺得靚嘅風景同當地人嘅好，都係理所當然，所以In間唔時都會返回現實、返回香港。

「每一次返嚟，都覺得好多嘢都唔同咗，一樣嘅係，大家生活步速都仲係咁快！」

不過，好動嘅因子令佢好快就心癢，而家已經瞬間喺德國學緊德文喇！

 

一個人，並唔孤單；

一個人，世界變得更大。