秋風起，最好就係行下山，親親大自然㗎喇～一邊行山，最多都係影幾張相，或者野餐下咁，但估唔到呢個媽咪就當係教小朋友嘅好機會！

不過唔好誤會又係怪獸家長教小朋友「呢啲係tree tree」或者問佢毛蟲嘅英文係咩咁呀，佢係教小朋友愛護環境嘅道理。最近有網民喺青衣自然徑影到一個年輕媽咪拖住囝囝一邊行山一邊執垃圾嘅背影，到落山嘅時候再撞到佢哋，佢哋已經執咗半袋垃圾喇～

媽咪沿路見到有垃圾，囝囝就用鐵鉗夾起佢再放入垃圾袋帶走，真係好乖仔呀！

毛毛同呢位媽咪傾咗幾句，佢話執垃圾呢件事對一個三歲嘅小朋友嚟講就好似玩遊戲咁，其實都唔期望囝囝喺呢個年紀就會明白當中嘅真正意義，不過都好多謝囝囝肯陪媽咪做佢認為啱嘅事。 

媽咪仲話地球係屬於大家嘅，愛護環境人人有責，與其只係坐定定埋怨同批評，不如用實際行動去改變現況。真係講得好好呀，有個咁識諗嘅媽咪，小朋友第日大個仔都一定會係有公德心嘅好人！多謝你哋呀！

封面圖片、資料來源連結： Michelle Leong／香港初級行山之友、Koey Lin Ar Ngan／香港初級行山之友