細個激嬲媽咪，佢話「你躝呀！」，咁毛毛咪真係成條蟲咁躝出去囉，點知又畀佢話係咪玩嘢；畀媽咪鬧食飯食到天一半地一半，不如乜都唔好食喇，毛毛咪返房玩他媽哥池囉，又畀佢鬧係大嘥鬼！明明都聽晒佢話啦，到底我做錯啲咩喎！

台灣呢個同學仔都一樣呀，有次上堂畀化學阿Sir話佢坐姿唔好，坐得咁衰不如直頭搬屋企張梳化返學校坐，包佢坐得爽呀，點知第二日佢真係聽晒阿Sir話，搬咗張梳化入課室！

好多人都話中學生處於反叛時期，大人叫佢行東佢就明知唔啱都一定會行西，因為覺得聽晒人哋話好唔自己、好唔型吖嘛。不過呢個同學仔咁聽話，連梳化都搬到張返嚟，阿Sir一定老懷安慰喇。咁又係呀，一陣畀阿Sir罰洗test tube點算呀。

話時話，唔通佢哋真係為咗激阿Sir而喺屋企抬張梳化返嚟咁誠心？咁阿Sir都抵畀佢哋激呀！原來張梳化係棄置喺學校入面冇人用嘅，所以就畀佢哋搬咗返課室，趁落堂影張相玩下喇～

呢間中學嘅同學仔之前仲試過用木凳整咗道拱門出嚟！青春就是要瘋狂嘛，見到佢哋玩得咁開心，真係好想著起套校服，畀阿Sir鬧兩句，同班兄弟嘻嘻哈哈咁又過一日呀！

封面圖片、資料來源連結：整個很成功高中