早前，fb上流傳咗幾張唐狗嚴重受傷嘅相，話相中嘅狗狗Mimi本來係畀沙頭角某間茶座養緊嘅，但當Mimi唔小心畀山豬攻擊到嚴重受傷之後，主人竟然完全冇諗過救返佢，令Mimi傷勢愈嚟愈嚴重。而今日，救走Mimi嘅義工就喺fb page「毛孩守護者」度同大家跟進Mimi嘅最新消息。

多得「毛孩守護者」義工嘅出現同醫療團隊嘅協助，將Mimi眼窩入面嘅壞死組織同蛆蟲清除，處理好傷口，令Mimi嘅傷口唔會再惡化落去。而Mimi因為太攰嘅關係，而家已經好好休息緊嚕～

雖然Mimi仲需要進一步檢查，未來亦有機會要面對多次小手術，不過而家見Mimi瞓得咁好，相信一眾關心Mimi嘅朋友仔都可以放心。希望Mimi可以繼續硬淨，順利渡過難關，做隻肥肥白白、健健康康嘅唐狗仔。

資料來源：Facebook page「毛孩守護者」同意轉載