結婚戒指嘅意義咁重大，戴咗梗係唔可以亂咁除啦。如果見到一個男人除低隻戒指，應該只得兩個原因，一係佢好錫老婆，要幫老婆洗碗，一係佢就想出去曳曳，唔想畀人知佢已婚……德國有個82歲嘅老伯伯明明結咗婚都唔戴戒指，原來唔係佢唔想戴，而係隻戒指唔見咗呀！

話說3年前佢喺花園種緊嘢嘅時候，唔小心整唔見咗隻結婚戒指，佢梗係sad到爆啦，但係都深信隻戒指總有一日會返去佢身邊。好不幸地，佢老婆喺半年前過咗身，唉，老婆又走咗，代表佢哋感情嘅戒指又唔見埋，伯伯一定灰到盡頭啦。

點知最近，伯伯竟然喺花園一條紅蘿蔔度搵返隻咁重要嘅結婚戒指呀！人哋話種瓜得瓜，而家種蘿蔔得戒指，都幾surprise呀！唔知戒指嘅重現，會唔會係死鬼老婆嘅暗示呢？可能佢想叫伯伯唔好諗住搵過個，如果唔係，下場就會好似條紅蘿蔔咁，箍到唞唔到氣呀…… 

封面圖片、資料來源連結：每日郵報