面對香港嘅土地問題，毛毛呢類「非傑青」，就只可以日日呻買唔到樓。

但喺地球嘅另一邊，呢個澳洲家庭竟然有樓唔住，揸住露營車四處漂泊。

唔通澳洲都有土地問題？

其實Justin Lorrimer、Bec Lorrimer兩夫婦，唔係因為土地問題而決定要過呢種生活。

佢哋只係希望透過呢種模式，同佢哋嘅3位小朋友一齊，享受啲高質素嘅家庭時光。

日前，佢哋揸車嚟到悉尼南岸傑維斯灣，得到一次畢生難忘嘅經歷。

話說當日，Justin如常將車泊好，喺車上面同佢3位小朋友沖涼。沖完無耐，竟然有一隻袋鼠仔跳咗入車。搞咗一輪，袋鼠仔都係唔肯走。Justin就決定用蘋果，引誘返呢隻袋鼠落車。

一日之後，Justin起身竟然見到有一隊袋鼠軍團喺佢哋嘅露營車外面！

估計袋鼠仔應該係食過返尋味，食完好味嘅蘋果之後，即刻同親朋戚友通風報信：

「喂，聽日一齊開個蘋果Party囉？」

袋鼠就開心喇，不過Justin應該幾頭痕。到底今次，佢要用幾多個蘋果先可以引走晒呢班袋鼠呢⋯⋯

封面圖片及資料來源：Trip In A Van／Facebook－Youtube－Instagram