可能喵星人聽得人類話「貓有九條命」多，真係以為自己福大命大又藝高貓膽大，成日都做埋晒啲高難度動作，佢自己就覺得好好玩呀，難為喺隔籬嘅貓奴嚇到心肝仔卜卜跳！

就好似呢隻喵星人咁呀，大大個車身任佢玩，但佢就偏係唔爬，係都要懶有性格咁行車窗條一吋闊都冇嘅邊邊。咁又係嘅，畀你估到就唔係喵星人啦。

主子，奴才食鹽多過你食草呀，咁玩法你一定跌落嚟㗎！快啲落返嚟啦！

話口未完，喵星人真係落返地，不過就唔係自己爬落嚟，而係跌落嚟囉……唉，今次你真係老貓燒鬚喇。

作為一個主子，喺蠢奴才面前跌親又真係7上加7嘅，好彩佢見慣大場面，定一定神之後，嚟個魯芬急轉彎，即刻碌地扮得意！

「蠢人類真係蠢人類，見到朕露個粉嫩粉嫩嘅肚仔出嚟賣下萌，就狗衝過嚟讚朕巧打耳，睇下仲有邊個會記得朕頭先嘅7事！」以萌遮醜咁高招都諗到，喵星人果然係外星高智慧生物，抵做佢忠心嘅奴才嘅！

凄いとこを見せようとして失敗した猫の誤魔化し方があざとすぎる件 pic.twitter.com/CjITzDaLx6

— しぇあ (@share4649) October 19, 2016

封面圖片、資料來源連結：share4649／twitter