打工仔做任何嘢，一個字，快！浸浴啲咁奢侈嘅事，一係唔浸，一浸就梗係要玩盡佢啦！日本人浸浴有特別多方法，唔知係咪見到有公司出食物浴鹽玩咁大，連Bandai都忍唔住玩埋一份，學人出關東煮入浴劑呀！啱啦，上次有湯無餸，今次等毛毛加返啲料先～

睇吓內容物，喂，檸檬嚟嘅，唔多似關東煮喎，原來照國際慣例，入面收埋咗個食物模型。只要將個黃色波波掉入水，核心外圍亦即係核心嘅內圍嗰啲入浴劑就會溶解喺水入面，然後個模型就會出現㗎喇～全套八款食物模型都係關東煮必食食品，諗起都覺得Juicy 呀！

你睇吓呢條八爪魚鬚幾誘人～仲有好好味嘅竹輪、福袋、糯米丸呀！雖然唔係真係食得落肚，但係每款都做得好有心機，浸完仲可以掛喺袋度?。呢排陰陰凍咁，想像吓可以暖笠笠咁同一堆關東煮浸喺嗰湯度，係咪突然覺得自己好入味，想啜自己一啖呢～


咩話，驚浸耐咗入味得濟？唔駛驚，呢隻入浴劑，雖然同關東煮一樣黃黃地色，但其實係檜木味嚟㗎。如果上次睇完食物浴鹽，心思思想試吓與食物共浴嘅感覺，但又唔想咁快打大佬，不如就由視覺開始挑戰啦！不過呢隻入浴劑，暫時只係得日本嘅各大零售店同超市有售咋。

買唔到唔緊要啦，可以好似呢個仁兄咁，鍾意Nutella咪一嘢倒晒落去個浴缸度，沖住朱古力榛子浴先都得㗎啫！再唔係開包火鍋湯底或者放粒濃湯佬，落啲牛丸呀蝦丸浸住先囉～有咁多選擇，係咪覺得好煩惱，唔知揀邊款嚟浸好呢？

煩咩啫？你都冇浴缸。

封面圖片及資料來源：itmedia.co.jp 、Bandai.jp

延伸閱讀：【堅﹒香噴噴】呢個食物味浴鹽會唔會愈用愈肚餓㗎？