由細到大，身邊總有個正義魔人，聽到你講曳曳嘢就會9秒9大大聲咁話「哦～～～我話畀老師知！」再加埋隻淨係識指人唔識指自己嘅死人手指同瞪到大一大嘅眼，真係好想一巴煎埋去……要做正義魔人唔緊要呀，但問題係可唔可以畀些少創意呀大佬！次次都係手指指＋哦哦聲，你唔悶我都厭啦！

台灣呢個正義朋友就唔同喇，思想純潔得嚟仲好creative，即係有創意呀！話說開頭壞朋友畫咗幅既抽象又寫實嘅畫，毛毛咁pure咁ture，都唔係好知佢畫緊咩㗎，總之你覺得係咩咪咩囉～

點知呢幅線條簡單但思想唔簡單嘅畫，畀正義朋友加咗幾畫，就變做一個戴眼鏡嘅公主喇！眼鏡公主表示：其實我都唔想咁搶鏡㗎，不過我一出場，大家都會望實我個髮型嘅～

嗯，上面幅畫，相信都唔使毛毛多講啦，咪就係兩隻手再加兩個好有親切感嘅形狀囉。可能壞朋友想借畫言志，表達自己想喺下一屆奧運參加劍擊項目嘅心啩。

正義朋友一出手，就成功扭轉劣勢，變做Mini人s做鬼臉嚇退魷魚怪喇！如果你知本身係畫緊咩嘅話，就更加覺得Mini人s隻黑黑嘅眼珠好有神?呀！

壞朋友畫緊咩呢……毛毛真係睇唔透，可能係流鼻水嘅大笨象同兩條塞咗嘅膠水喉啩（其實毛毛真係兜得好辛苦）。

正義朋友畫畫畫，就成個童話故事出晒嚟，原來手指家族入面其中一個成員畀鱷魚食咗呀！唔怪得佢哋驚到流晒大汗啦！

最後一幅，壞朋友畫嘅應該係世人喺丁丁大神嘅眷顧下集體盡情做愛做的事咁囉。

不過呢個畫面真係太道德淪亡，正義朋友睇唔過眼，揮筆將呢個崩壞嘅世道帶返去光明一面！睇下，世界本來應該係鳥語花香先啱㗎！純潔嘅人睇咩都係咁有童真，但係根據咩人睇咩嘢嘅道理，思想曳曳嘅人應該會調返轉，就算睇到下面幅畫都會諗到上面幅畫啲曳曳嘢。

封面圖片、資料來源連結：dcard

睇埋：【天才小畫家】中文書啲古人 被人畫到咁樣樣？