影相嚟講，毛毛唔在行，不過扮識影相，就係毛毛嘅專長喇！影咗張麻麻地嘅相，最簡單就係校黑白，扮晒大師咁，到時實個個都讚張相有feel呀！講到化腐朽為神奇，外國呢個網民都有毛毛一成功力，無論係影得幾差嘅相，只要經佢改一改，就會變做電影海報咁樣樣！

好似呢張相咁呀，構圖方面都係四平八穩咁影個古跡囉，實冇死嘅，不過都冇咩特別之處。

點知改圖神人加個filter，加幾隻英文字，就將張爛相成功變咗張勁有feel嘅電影海報喇！一睇就知係講古文明點樣衰落嘅電影啦！

仲有呢個爛鬼南瓜擺設，過咗Halloween仲搵鬼望多佢一眼咩。改一改，就變咗科幻驚慄電影嘅海報喇！

一張平平無奇嘅海浪相，就變咗探討生與死嘅電影海報……呢個故仔，應該係講一個好爸爸出海行船，點知途中遇上大風浪，喺生死一剎要作出沉重決定：救邊一個船員先……講講下毛毛都覺得好沉重呀……

呢個唔係咩自然奇觀博物館，而係外國一個地鐵站呀！呢張相本身個景都幾靚，加上光線又唔錯，可塑性睇嚟都幾高。

嘩，唔使講都知，呢套戲一定係講地鐵入面有喪屍，大家要喺一個密閉空間逃生嘅超緊張電影！

而呢張……唔講都真係唔知佢影緊乜，聽講係星空酒喎，影到咁樣樣，睇嚟佢真係醉喇。不過神人都冇有怕，一樣改到好有水準，一張爛鬼酒相都改到做深討人類生存意義嘅電影海報，高手高手高高手。 

​

好彩毛毛改圖都唔差，求其一張相都可以畀我改到好有feel㗎，不過係長輩feel咁解啫。

封面圖片、資料來源連結：reddit